ثابت حقی گلنار ائدر، خالق کی، یوخ دان وار ائدر

اَلحَمْدِللِه الَّذی خَلَق السَّمواتِ العُلی
کاندان تاپار خاک زمین فیض باهار دلگشا.
برهان حق دیر، ای کؤنول، هر نسترن نسبتلی گل،
صانع اولان ممکن دئگیل، مصنوعی دن اولماق جدا.
تا ختم احوال درون عرض ائتدی عقل لایفنون،
معبوده اولدی رهنمون، تاپدی طریق اهتدا.
ثابت حقی گلنار ائدر، خالق کی، یوخ دان وار ائدر،
بیر کاندان اظهار ائدر مین طرفه لعل خوش نوما.
جمع پریشان کیم، ایتر، رهبرلری سنبل یئتر
کیم، تیره تورپاقدان بیتر، ائیلر کؤنول لر مبتلا.
حق مظهری دیر هر چیچک، گر دوتسان ای نقاش شک،
بیر نارون شکلینی چک، وئرگیل اونا نشو نما.
خت وئردی ریحان کیم، یقین بیر تانری وار، ای اهل دین،
عُوذُوا بِرَبَّ العالَمین اِنْتَهُوا مِمّا نها
دوتموش حقه نرگس یوزون، آچمیش حقیقت بین گؤزون،
قیلمیش نظر، گؤرموش اؤزون سرّ حق ایله آشنا.
لاات منزّه پرتوی قداحی ائتمیش حق ائوی،
هم صوری و هم معنوی گؤر اوندا اسرار خدا!
بوستاندا گؤر نیلوفری، دوتموش طریق برتری،
ازهارین اولموش رهبری، اسرار اولموش آشنا.
راه طلب دیر بی عدد، معبوده ای اهل خرد،
گر ایسته سن قرب صمد، صدبرگ اولور رهبر سانا.
زنهار محو اول حکمته، باخقیل کمال قدرته،
نیلوفر خوش صورته، گؤر کیم وئریر آب و هوا.
گر اولماسان مدهوش تک، باخسان بیر اهل هوش تک،
حقا کی، برزنگوش تک، تسبیح خوان دیر هر گیا.
شاخ اولدی منبر یکسره، چیخدی شکوفه منبره،
صلوات ائدر پیغمبره، صل علی خیرالورا.
صحن چمنده ارغوان، هر برگی ائتمیش بیر زبان،
تکرارائیله‌لر هر زمان مدح علی المرتضی .
ضایع کئچیرمز یاسمین عمر لطیف و نازنین،
اخلاص ایله ائیلر اؤزون خاک ره خیرالنسا.
طرفه ریاحین سربسر کسب ائتدی عطر مشک تر،
خُلق حسندن بیر اثر گلزاره گؤسترجک صبا.
ظاهر قیلیر خونین کفن، لاله قیلیر یوز پاره تن،
دوتار دؤنوب طرف چمن، شاه شهید ایچون عزا.
عابد صفت چکمکده غم، اولموش بنوشه قدّی خم،
گویا قیلیر اول پاک هم، زین العباده اقتدا.
غم دفعی ایچون هر طرف، گلشنده چکمیش سبزه صف،
باقر ثناسینده شعف بولموش قیلیر ورد ثنا.
فیض حق ائتمیش آرزو، چیخمیش شقایق سرخ رو،
قیلمیش به امر حق قُلوا صادقی قیلمیش پیشوا.
قهرایله چرخ لاجورد گر یاسمینی قیلسا زرد،
نه غم چو گؤرجک اهل درد، ائیلر اونا کاظم دوا.
کشف ائتمه یه اسرار حق آچمیش سمن سیمین ورق،
وئرمیش اونا گویا سبق، علم ایچره شاه دین رضا.
لعبت صفت گؤر زنبقی، گلزارا وئرمیش رونقی،
اولموش هوا خواه تقی، کسب ائیله‌میش اوندان صفا.
مداح تک سوسن دیلی اولموش مدایح ناقلی،
مدحی نین اولموش قائلی، سلطان نقی بحر عطا.
نسرینین آچیق دفتری اولموش حقایق مظهری،
اوندان صفات عسکری فهم ائتمیش ارباب ذکا.
وقت اولدی غنچه آچیلا، گل خورده سین ظاهر قیلا،
مهدی ظهورینی بیله، فاش ائده سرّینی قضا.
هر یئرده تا نوروز اولا، گل بوستان افروز اولا،
نوروز تک فیروز اولا ایام شاه اولیا.
یعنی گول گلزار جان، حیدر امام مؤمنان،
اول کیم، اونا دیر بیگمان، مسکین فضولی بیر گدا.