تیر آهیم بی خطا، تأثیر ناله م بی گمان

من کیمم؟ – بیر بی کس و بیچاره و بی خانمان،
طالعیم آشفته، اقبالیم نگون، بختیم یامان.
نم لی اشکیمدن زمین مملو، اونومدن آسمان،
آه و ناله م ناوک و پیوسته، خم قددیم کمان.
تیر آهیم بی خطا، تأثیر ناله م بی گمان،
متصل غمخانۀ سینمده یوز غم میهمان.
قاندا بیر غم ایتسه، مندن ایسته سین لر، من ضمان،
یوخ منه قید بلا و دام محنتدن آمان.
چیخدی جان کؤنلومدن اندوه و غم و محنت همان،
ای منیم جانیم سن و کؤنلوم سنینله شادمان.
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان

بلبل زارم، گل رخسار آلیندن جدا،
طوطی لالم، شکرنسبت مقالیندن جدا.
دئر ایدیم صبر ایلییم، اولسام جمالیندن جدا
بیلمدیم دشوار ایمیش اولماق وصالیندن جدا.
تیره اولدی روزگاریم زلف خالیندن جدا،
اولدی صحرا منزلیم وحشی غزالیندن جدا.
مو تک اینجلدی تنیم نازیک نهالیندن جدا،
خم گتیردی قامتیم، مشکین هلالیندن جدا.
چیخدی جان ناتوان، شیرین زلالیندن جدا،
اولدوم، القصه، رخ فرخنده فالیندن جدا.
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان!

سینه چاک و دیده نمناک و بدن افگاردیر،
جان حزین، خاطر غمین، شیدا کؤنول بیماردیر.
من بو غم ایچره کی، دفعین ائیله مک ناچاردیر،
مصلحت سوردوم، دئدی لر مصلحت اظهاردیر.
سؤیلدیم درد دلیمی بیلدی اول کیم یاردیر،
قیلمادی بیر رحم بس کیم، ظالمو خونخواردیر.
داخی اظهار ایلمن، نه حاجت تکراردیر،
ائیله ییم صبر و تحمل تا حیاتیم واردیر.
جانه یئتگج تا کی، منده قوت گفتاردیر،
سؤیلرم: ای گل کی، سندن آیریلیق دشواردیر،
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان!

فارغ ایدیم جمله عالمدن، بیلیر عالم منی،
عیب ائدردی بی خبر سانیب بنی آدم منی.
قویمادی دوران چرخ اؤز حالیمه خرم منی،
شاد ایکن عالمده، چرخ ائتدی اسیر غم منی.
عشق ناگه اولدی پیدا، توتدی مستحکم منی،
سالدی یوز سئودایا اول گیسوی خم در خم منی.
شیمدی مجنوندان غم عشق ایچره سانمین کم منی،
یار خود قیلماز حریم وصلینه محرم منی.
سن کی، محرم سن، صبا، بالله، آنیب هر دم منی،
سؤیله ای گل کیم، سنه بخت ائیله مز همدم منی.
سنسیز اولمان آیری محنتدن، بلادن بیر زمان،
الامان، هیجارن بلا و محنتیندن، الامان!

یار بیلگج حالیمی بیر رحم پیدا ایلسه
آنلاییب درد دلیمنی، بیر مدوا ایلسه.
اولمایا غافل منه من بعد، پروا ایلسه،
رحم ائدیب، آنجاق منی عالمده رسوا ایلسه.
تا اؤزون کؤنلوم اونون عشقینده شیدا ایلسه،
توتا دامانین اونون، وصلین تمنا ایلسه،
قیلمایا اکراه جورایله، مدارا ایلسه،
توتا دامانین اونون وصلین ایلسه،
دوشمدن اوندان جدا کؤینده ماروا؟؟ ایلسه
دوشمه یه اوندان جدا، کویینده معوا ایلسه،
گر اؤزوندن اونی یار آییرسا، غوغا ایلسه،
درد اوزندن آنی یار ایسه غوغا ایلسه
دمبدم یوز شوقیله بو بیتی انشا ایلسه:
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان!

عاقبت آهیم منیم اول ماهه تأثیر ائتمه سه،
بونجه افسونوم پریوش یاری تسخیر ائتمه سه،
یار حال زاریمه بیرفکر و تدبیر ائتمه سه،
زلفونو عاشق لرین بوینونا زنجیر ائتمه سه،
یار، یار اولماز، کؤنول، عشاق ایله بیر ائتمه سه،
بیوفالیق رسمینی گلدیکجه تغییر ائتمه سه،
اول جوان نازنین میل منی پیر ائتمه سه،
توتارام بیر یار من، هم عمر تقصیر ائتمه سه،
عاشقین قیدینده یوز نیرنگ و تزویر ائتمه سه،
گؤرموین ساعتده یوز عذرایله تقریر ائتمه سه،
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان!

فرق عشق ایچره، فضولی، عزّ و جاهیم دیر منیم،
شیوۀ مهر و محبت رسم و راهیم دیر منیم،
دردیمی ثابت قیلان عشاقه آهیم دیر منیم،
آه بو دعواده بیر عادل گواهیم دیر منیم،
گرچی غم مقصودی قتل بی گناهیم دیر منیم،
غم دئگیل، چون کنج میخانه پناهیم دیر منیم،
درگه پیر مغان امیدگاهیم دیر منیم،
من اونون بیر چاکری، اول پادشاهیم دیر منیم،
ای کی، هر جرم اولسا لطفون عذرخواهیم دیر منیم،
آیران سندن منی، بخت سیاهیم دیر منیم،
سنسیز اولمان آیری محنتدن، بلادن بیر زمان،
الامان، هجران بلا و محنتیندن، الامان!