محنت آتشکده سی شعله لنیب سینمه ده

جانیم آشفته، اسیر دل شیدا اولدی،
جسمیم آواره، دچار غم دنیا اولدی.
روحومو وسوسۀ شوق بدن سارسیتدی،
گؤزده گؤرمک هوسی گئت گئده پیدا اولدی.
محنت آتشکده سی شعله لنیب سینمه ده،
باشیمین آغری سی نین علتی سئودا اولدی.
فطرتیمدن دوغولان پرده نشین بیر دلبر،
پرده نی آتدی، آچیب سرّینی، رسوا اولدی.
جسم و جان ایله کؤنول میل ائله‌دی دنیایه،
سؤز اوزاندی آرامیزدا، سون و غوغا اولدی.

گؤردولر بی کس و مغلوب و گون و تیره منی،
هر اوچو باغلادیلار ظلم ایله زنجیره منی.