رحم قیل، دولت لی سلطانیم، مروت چاغیدیر!

حاصلیم برق حوادثدن ملامت داغیدیر،
مسندیم کوی ملامتده فنا توپراغیدیر،
زار کؤنلوم تنده زندان بلا دوتساغیدیر،
رحم قیل، دولتلی سلطانیم، مروت چاغیدیر!

دور جوریندن تن و جانیمده راحت قالمادی،
صورت حالیمده آثار فراغت قالمادی،
محنت و غم چکمگه من بعد طاقت قالمادی،
رحم قیل، دولتلی سلطانیم، مروت چاغیدیر!

کؤنلومین ملکون جفا سیلابی ویران ائیله‌دی،
بختیمین حالین هجوم غم پریشان ائیله‌دی،
باغریمی اندیشۀ دور فلک قان ائیله‌دی،
رحم قیل، دولتلی سلطانیم، مروت چاغیدیر!

انتهاسیز جورلر اودلاره یاندیردی منی،
آجی سؤزلر طاملو جانیمدان اوساندیردی منی،
خلقدن بیهوده فریادیم اوتاندیردی منی،
رحم قیل، دولتلی سلطانیم، مروت چاغیدیر!

ایسته‌ییب بیر چاره، چوخ یئلدیم، یوگوردوم هر یانا،
رحم ائدیب، بیر کیمسه امداد ائتمه‌دی مطلق مانا،
چاره‌سیز قالدیم، مروت ایسته‌ییب گلدیم سانا،
رحم قیل، دولتلی سلطانیم، مروت چاغیدیر!

داده گلدیم عدل دیوانینه، فریادیم ائشیت!
شرح حالیم سور، مرادیم وئر، الیم توت، فکریم ائت!
سن کی، عادلسن، گؤر افغانیم نه‌دندیر، غورم یئت!
رحم قیل، دولتلی سلطانیم، مروت چاغیدیر!

گؤر فضولی‌نین رخ زردینده اشک آلینی،
پردۀ اقبال توتموش صورت اقبالینی،
دردمندین‌دیر، عنایتلر ائدیب سور حالینی،
رحم قیل، دولتلی سلطانیم، مروت چاغیدیر!