رقیب بوالهوس مقصوده یئتدی

غمیندن غنچه تک دل قانه دؤندو،
ایشیم بولبول کیمی افغانه دؤندو.
یامان گؤز یاخشی دگدی وصل یاره،
وصالیم محنت هجرانه دؤندو.
پریشان، تیربخت، آشفته حالم،
گونوم اول زلف مشک فشانه دؤندو.
کناریمدان چون اول دور اولدو غایب،
گؤزوم یاشی آخیب عمّانه دؤندو.
حذر قیل ماجرای چشم تردن،
سرشکیم بهر بی پایانه دؤندو.
او دور گنج حسنون فرقتیندن،
کؤنول بیر منزل ویرانه دؤندو.
دخی سنگ جفادن خالی اولماز،
دو چشمیم کفۀ میزانه دؤندو.
رقیب بوالهوس مقصوده یئتدی،
دیل سیّد جفادن قانه دؤندو.