سرّ دهانین فاش ائتمه سیّد

هر دمده قیللام نئی تک نوانی،
سالدین نظردن من بینوانی.
سیجینه دوشدوم هجر روخوندن،
“تعریف مکانی، یا من یرانی”*.
یاندین بو ناره، خاک اولدون، ای دل،
تؤک آب گؤزدن، ترک ائت هوانی.
غنچه دهانین اسرارین آچما،
سن محرم ائتمه باد صبانی.
اول چین زلفه گر نسبت ائتسم،
بیللاه خطا دیر مشک ختانی.
کاکیل غمیندن وار سرنوشتیم،
دؤندرمک اولماز باشدان قضانی.
عارف گؤزونده وحدتدی کسرت،
کسرتده سئیر ائت ذات خدانی.
ظاهرده کسرت، باطنده وحدت،
وحدت گؤزویله گؤر ماسیوانی.
دریادی قطره، دریایه دوشسه،
دوش بهر عشقه ایله شیتانی.
گر ذات حقی بولماق دلرسن،
اغیاری ترک ائت، تاپ مرتضی نی.
عالمده یوخدور بیر اوندان اؤزگه،
احول دئگیلسن بیر گؤرسن آنی.
ذات محمد ذات علی دیر،
ایکی بدنده بیر بیل او جانی.
سرّ دهانین فاش ائتمه سیّد،
نادانا آچما راز نهانی.
——————————————
* ای منی آختاران، منیم مکانیمی تانی.