سیّد کی، بیلیر اؤز اؤزونو مرفعت اهلی

آشفته لیگیم زلف سیه تاری بیلیرمی؟
یا رب، گؤره سن درد دلیم تاری بیلیرمی؟
بیلمز، بیلیرم یار منیم سوز نهانیم،
طوفانه دؤنن گؤز یاشیمی، باری، بیلیرمی؟
گیرم بو گئجه قالدی گؤزوم یولدا، نه نفی،
اول ماه اؤزو ائتدیگی اقراری بیلیرمی؟
گیرم کی، دؤگر باشینی سجاده یه زاهد،
ترساده اولان معنی زنّاری بیلیرمی؟
واعظ کی، دئیر مئی ایچنه اهل جهنم،
بیر مغفرت قادر غفاری بیلیرمی؟
عابد کی، ائدیر جنّت ایله کوثره رغبت،
میخانه ایله بادۀ گولناری بیلیرمی؟
سیّد کی، بیلیر اؤز اؤزونو مرفعت اهلی،
بیرجه سوروشون، فیض دهو چاری بیلیرمی؟