ایام وصل گئتدی الیندن بو سیّدین

رخساری گرچی چاه دا پر آب و تاب ایدی،
گویا کی، برج دلوده بیر آفتاب ایدی.
اولماز باهار موسمی گون دلو دن عیان،
اما او شمس دلوده شئیون اوجاب ایدی.
گؤرموشدو خیضر آب بقانی او چاه دا
پس گؤزلرینده چشمۀ حیوان سراب ایدی؟
اول دلو آسمان ایدی، یوسف بیر آفتاب،
سانما کی، حبل مشک سیه دن طناب ایدی.
آتش بوروزه گلدی او چاه ایچره آبدن،
منظور کاروان او زامان گرچی آب ایدی.
غواص اولوب بشیر او دریای چاه دا،
حاصل او بحردن اونا بیر دور ناب ایدی.
ایام وصل گئتدی الیندن بو سیّدین،
گویا کی، بزم وصل خیال ایدی، خواب ایدی.