سیّد، او گون اولورمو گئنه صحن باغده

قربان اولوم او گؤزلره کیم، گؤردو یاریمی،
یاریم گؤره ن گؤز، البت آلیر اختیاریمی.
قوی بیر اؤپوم او گؤزلری کیم، یاریمی گؤروب،
قربان ائدیم او گؤزلره من هر نه واریمی.
نرگیز گؤزو قالیر آچیلا گؤرسه باغده،
چشم خومار و سرو قد و گولعذاریمی.
مردملوک اولمادی منه چون چشم یاردن،
کسدیم گؤزومدن آخری اؤز اعتباریمی.
بیماری اولموشام من او بادامی گؤزلرین،
عناب گؤزلریم ائله سین فکر کاریمی.
شادم کی، خاک ائده منی بو چرخ کج مدار،
دامان یاریمه یئتیره تا غباریمی.
سیّد، او گون اولورمو گئنه صحن باغده
خرم گؤروم شکفته گول نوباهاریمی؟