سیّدا، سن کیمی عاشیق دئگیل اول زلفه اگر

بیر کؤنول کی، اولا اول ماه لیقادن خالی،
بو یقینیم دیر اولور نور خدادن خالی.
دوشنی کؤنلومه رخسار منیرین مهری،
بو سیه خانه دئگیل هیچ ضیادن خالی.
نافۀ چین دئمیشم زلف عبیرافشانین،
بیلمیشم کیم، دئگیلم سهو خطادن خالی.
دیل پرخونه دگندن بری تیر سیتمین،
دیل دئگیل هیچ بو احسانه دعادن خالی.
نئجه اظهار ائلییم درد نهانیم او گوله،
کی دئگیل، یعنی اونون باد صبادن خالی.
خالی بیر نقطه دیر، اما کی، ائدیب یوز دلی صید،
هیچ بیر نقطه دئگیل امر قضادن خالی.
سیّدا، سن کیمی عاشیق دئگیل اول زلفه اگر،
نیه آیریلماییر اول زلف دوتادن خالی.