سرورتله چو گلدی عالم ناسوته اول گولروخ

زولال لب لرین “عین التسما سلسبیل”* اولدو،
دئدیم بیر جوره اوندان، عالمه قانیم سبیل اولدو.
دهانیندان سر مو قدری سؤز اظهار قیلمیشدیم،
دوشوب سؤز عالمه وار و یوخ اوسته قال و قیل اولدو.
دئسم پیغمبر عصرم، دئگیل دیر کفر، زیرا کیم،
پیامیم وحی مونزل، قاصدیم بیر جبرئیل اولدو.
اگرچی، یاندی کؤنلوم هجر اودوندان، کویوه، ای مه،
قارانقو گئجه لرده شعلۀ آهیم دلیل اولدو.
آییردی اول عزیزی ناگه اخوانین جفاسیندان،
او یوسف فرقتیندن هر گؤزوم بیر رود نیل اولدو.
چو گؤردو غمزۀ فتانینی، خوفیندن ازرایل،
کمند زلفوه سالدی اؤزون، مسکین دخیل اولدو.
سرورتله چو گلدی عالم ناسوته اول گولروخ،
عزیز عالم ایکن سیّدین خوار و ذلیل اولدو.
—————————————————-
* بهشتده آخان چشمه