منو
یاندیردی منی شعشعۀ نور جمالین
دل عاشیق اولوب زلفوه سئودا لره دوشدو،
مجنون کیمی زنجیرایله صحرا لره دوشدو.
تا جامه اوزون عکسی دوشوب، ای لبی مئیگون،
چوخ خام طمع غیر تمنا لره دوشدو.
سرّ دهنین سؤیله‌دی لر رمز ایله مردم،
بو مبهم اولان نقطه معما لره دوشدو.
زلفون ائله‌دی خاطر عشاقی نشیمن،
اول شکل چلیپا بو کلیسا لره دوشدو.
تا قطرۀ نئیسان اولا دندانوه نسبت،
ال ابردن اوزدو، دل دریا لره دوشدو.
گه سرزنش خلق، گهی کینۀ گردون،
عشقینده باشیم، گؤر کی، نه غوغا لره دوشدو.
یاندیردی منی شعشعۀ نور جمالین،
موسی کیمی سیّد بو تجّلا لره دوشدو.