خال خیالی خالی ائدیب بس کی، عقل دن

خال و خطین اولوب دل ویرانه اوغروسو،
اولدو ایکی قاراچی بو بیر خانه اوغروسو.
شمع جماله یاندی کؤنول، اؤپدو لعلوی،
مقصودونا یئتیشدی بو پروانه اوغروسو.
مشاطه پاک ائدر عرق روی یاریمی،
لازیمدی قطع ید اولا دوردانه اوغروسو.
اول گئجه دن کی، شانه دگیب تار زلفونه،
صدچاک کؤنلوموزدور اولان شانه اوغروسو.
لعل لبین خیالینا دوشموش دل حزین،
بو دزد اولوب خزانۀ شاهانه اوغروسو.
دیل باسدی باغرینا بو گئجه زلف پرخمی،
زنجیر عقلین اولدو بو دیوانه اوغروسو.
خال خیالی خالی ائدیب بس کی، عقل دن،
خرمن گزیب بو سیّد، اولوب دانه اوغروسو.