توتولموش غنچه تک هجرینده غمدن خاطر سیّد

اؤلونجه چکمنم میخانه دن هرگز قدم، ساقی.
اله آل سن ایاغ بادنی ایله کرم، ساقی.
نه اولدو بؤیله کیم، ایندی ذلیل روزگار اولدوم،
منی پیر مغان ساخلاردی دایم محترم، ساقی.
بیلورین ساغری لبریز قیل خورشید صهبادن –
کی، بیزدن راضی اولسون خاطر جمشید جم، ساقی.
خیال تاق ابروی کج محراب مثلینله،
الیف تک قامتیم کئیسولرین تک اولدو خم، ساقی.
دهان یار فکریله یوخ اولدو جملۀ واریم،
وجودوم اولدو، گؤر بیر نقطه عشقینده عدم، ساقی.
بهشتی وئردی آدمدانه یه، من دانۀ خاله،
اولوم قوی خالوا قربان اؤزوم من، هم ددم، ساقی.
توتولموش غنچه تک هجرینده غمدن خاطر سیّد،
سر مینانی آچ، خاطردن ایله دفع غم، ساقی.