نئچه گون عالم ناسوته گلیب اولدو مقیم

دوست لر، من گؤره ن اول دلبر زیبا کیم ایدی؟
داغی دان گول اوزونه زلف مطرا کیم ایدی؟
من کی، بیهوش دوشوب، گؤرجک اؤزومدن گئتدیم،
سیز کی، هوشیاردیز، اول آفت دنیا کیم ایدی؟
نه کؤنول قویدو، نه جان منده، نه صبر و، نه قرار،
ائتدی غارت منی، اول شاهد یغما کیم ایدی؟
اول اوزو جنّتی من بیلمه سم آدم دئگیلم،
لبی کوثر، اوزو گول، قامتی توبا کیم ایدی؟
دوست لر، دون گئجه کیم، مست مئی وحدت ایدیک،
او بیزه ساقی اولان یار دل آرا کیم ایدی؟
دولدو انوار محبتله گئنه سینه بو گون،
گؤسترن وادیی سیناده تجّلا کیم ایدی؟
بو نه بهجت، نه صفا دیر، نه سورورو، نه بها،
سیزی تاری، او نگار فرح افزا کیم ایدی؟
کیمدی بو مجلس عرفانی بو شوره گتیرن،
دور ساغرله وئرن بادۀ صهبا کیم ایدی؟
گلدی گفتاره لبی، عالمی احیا ائله دی،
بو نئجه روح ایدی، آیا بو مسیحا کیم ایدی؟
چشم قیبتی نه بیلیر خلقت هارون سرّین،
نه بیلیر دهرده فرعون کی، موسی کیم ایدی؟
اولماسان بادیۀ عشقده مجنون اگر،
بیلمه سن هیچ کی، سن، حضرت لیلا کیم ایدی؟
نفس واحددن اگر مطلبه اولسان واقف،
بیلیسن اوندا کی سن، آدم و حوا کیم ایدی.
حق ظهوروندا هله یولدا قالیب ایکی گؤزوم،
بس او حق مظهری آیینۀ اولیا کیم ایدی؟
قورتول اینوه عمرونده دئگیلسن واقف،
گؤره بیلمز کی، جمال حقه بینا کیم ایدی.
بو سر چشمه ازل دن بولانیب، ای غافل،
گؤر کیمه تابع اولورسان، سیزه مولا کیم ایدی؟
نئچه گون عالم ناسوته گلیب اولدو مقیم،
حیف کی، بیلمه‌دی لر سیّد روسوا کیم ایدی؟