علاج دردیمه سعی ائتمه، ای طبیب، دخی

ای عزیزیم، حساب یوخ یاشدا،
بو مشخصدی عقل اولور باشدا.

****

…دیلردی توستودن اولماق کناره،
بتر اوندان بو عیش کیم، دوشدو ناره.

****

سیّد او نوع وئرمه‌دی جان درد یاردن –
کیم، دشمنی ائشیتجک اونو شادمان اولا

****

اگر وصالوی حق خلقه قسمت ائتسیدی،
امید کیمسنه توتمازدی باغ رضوانه.

****

ائشیدیب اؤلمه گوی شهردن اؤلدوم، گئتدیم،
ائیله، ای ماه، منی ترک سفردن احیا.

****

اُمّ صیبان اوخویوب بنت العنب نوش ائتسن،
ائتمز ابنای زامان تک سنی لایعقل مست.

****

هر یئرده تؤکسه قانیم اول شوخ سرو قامت،
قان جوش ائدر او یئردن تا دامن قیامت.

****

وعدۀ دیداری فردای قیامت سؤیله دین،
سخت دلشادم کی، هرگز اول گونون فرداسی یوخ.

****

یار هر نامه کی، هر عاشیق بی عاره یازار،
یازسا بیر لطفومو یوز یول گئنه تکراره یازار.

****

سازی سکسنده اؤگرنن ادبار،
بیرده آنی قیامت اولسا چالار.

****

دئمه فراق اودونون دوزخه شباهتی وار،
بهشته دوزخین، ای بی خرد، نه نسبتی وار؟!

****

چمن شاهدلری کیم، سربسر توپراغه یاتمیشدی،
قیامت دیر بو گون کیم، باش چکیب تورپاق دن یکسر؟!

****

یوز ماما اولسا، ای گروه بشر،
بو مثل دیر کی، گوج دوغانه دوشر.

****

اولمازام وصل ایله آسوده کی، هنگام وصال
رشک قیللام اونا کیم، حسرت دیدار چکر.

****

بیر یاخشی اوچون یامان سئورلر،
گول خاطرینه تیکان سئورلر.

****

سنی حسن ایله بی نظیر گؤروب،
“وحده لا شریک لا” دئدی لر.

****

همدم یار اگر فرشته اولا،
عاشیق زاری بدگمان ائیلر.

****

ائشیتدیم تا قیامت قامتیندن بیر علامت دیر،
قیامت حسرتیندن هر گونوم یوز مین قیامت دیر.

****

اؤلمه ائشگیم، صاباح اولور یاز،
یونجا بیتیبن ایشین اولور ساز.

****

چیخارمی خاطریمدن بوسۀ لعل لب جانان،
نمک حقین فراموش ائیله ین لر کامیاب اولماز.

****

تا گرفتارینام، عشقین منی دلشاد ائتمیش،
رحمت اول شخصه کی، اول بونو بنیاد ائتمیش.

****

جمال یوسفه یعقوب میلیندن عیاندیر کیم،
کیشی اؤز اوغلونا عاشیق اولارمیش، یار اولمازمش.

****

سیّد، اؤتنده گوشۀ چشمیله باخدی یار،
اول ائتدیگی غضب لری هم عین ناز ایمیش.

****

ایسته سن ای ملک الموت کی، جانیم آلاسان.
گئت، منه صورت یاریمدا نمایان اول، گل.

****

من سنی اغیاره مایل سئومزم منع ائده لی،
دشمنیم دیر اول کی، کؤنلو حسنووه مایل دئگیل.

****

روز قتلی سیّدین ائیلر نئچین یار اضطراب،
گر بو مظلومه او شوخ سنگ دل قاتل دئگیل؟

****

فارغیمدن دئگیلم شاد، ولی اغیارین
باغری قان اولماق اوچون گول تکی خندان اولورام.

****

هر زامان دئرلر کی، قیل بیر تازه دلبر آرزو،
پادشاه لیق ائتمیشم کی، پاسبانلیق بیلمزم.

****

جان کوی نگاره اولدو عازم،
شهری گؤره نه بلد نه لازیم.

یاد اول گون لر کی، باور ائیله مزدیم، ای کؤنول،
گر شکایت ایلسیدی کیمسه هجر یاردن.

****

او مه یانیندا بیر گون قصۀ طوفانی کشف ائتدیم
کی، شاید واقف اولسون اشک چشمیم ماجراسیندان.

****

داخی، مهر وفا آختارما اهل حسندن، سیّد،
بو رسم کهنه منسوخ اولدو اول شوخین جفاسیندان.

****

الا، ای تیر دلبر کیم، کؤنولده میهمانیمسان،
اگر جان چیخماسایدی جسمدن، دئردیم کی، جانیمسان.

****

هر گونوم هجرینده، شاهیم، بیر قیامت ائتمیسن،
بیر بیلیرسنمی نه‌لر ای سرو قامت ائتمیسن؟!

بوندان بیل اشتیاقیمی کیم، بونجا رشک ایله
بیر غیری قاصد ائیله ییرم عرض حال اوچون.

****

علاج دردیمه سعی ائتمه، ای طبیب، دخی،
بو درد او درد دئگیل کیم، دوا پذیر اولسون.

****

آپاردیم قبره مهر رویون، اما قورخوم اوندان دیر –
کی، خاکیمدن چیخیب گول، غیرلر اوندان گولاب ائتسین.

****

خوبلار کؤنلومو ایستلله کی، سندن آلالار،
ای پری، قویما کی، اؤزگه منی تسخیر ائتسین.

****

رقیبیم رشک ائدر کیم، سیّده دلبر جفا قیلماز،
هاچان من خاطر دلداره دوشدوم کیم، جفا قیلسین؟

****

اوّل منه بیر لطف ائدیب سونرا قیلیر بیدادلر،
تا کیم شکایت ائتمگه لطف پشیمان ائیله سین.

****

یات راحتیله، توت اؤز سایاغین،
یورقانیوا دوز اوزات آیاغین.

****

بو قانلار تؤکمگیندن رشکیم آرتیر کیم، قیامتده
آچارلار توتماغا، ال هر طرف دن خلق دامانین.

****

گفتگو ائیلردی اغیارایله، گؤرجک گؤز یاشیم،
گلدی کیم، اوندان سئوال ائیلردیم احوالین سنین.

****

قامت و قاشیندان اولموش ازبریم نون القلم،
مکتب عشق ایچره من طفل سبق خوانین سنین.

****

بونجا داش آتما فلک، سیّد دیوانه یه کیم،
آتسا بیر داش ائله یر شیشه نی صدپاره سنین.

****

قاشیندا زخم گؤروب ای بت هلال ابرو،
دئدیم کی، قلپه لنن ذوالفقاره بنزر بو.

****

وصف رویینده بو روشن غزل، ای ماه، بو گون
یئری واردیر یازیلا صفحۀ افلاک اوزره.

****

غیرلر میل ائتمگیندن یاره بی حال اولموشام،
بس نولور حالیم منیم اول میل اغیارائیله سه؟

****

بو صَفّه ده پیری توللا گورگه،
دامه آتیلیر کوهن سوپرگه.

****

بیر گئجه هجران جزاسییچون اگر محشر گونو
آلمارام عرض ائتسه‌لر یوز حور و قیلمانی منه.

****

قاصد منی بهانه قیلیب گئتدی کویووا،
اول کودا بو بهانه ایله منزل ائیله دی.

****

یاغموردن ائیله ین فراری،
آخر دولویا دوشر گذاری.

****

تعجبدور کی، مجنون قالدی زنده هجر لیلاده،
مگر اول وقت هجرانین یوخ ایمیش بئیله تأثیری؟

****

لب بسته دیر اهل حال آغزی،
ائل آغزی، دئمک، چوال آغزی.

****

بلی، هر بیر کسین وار بیر سیاغی،
بؤیوک باشین بؤیوک دور آغریماغی.

****

نه یاخشی وصلده نامهربان ایدین منه کیم،
زامان هجرده چوخ ائتمه‌دی کباب منی.

****

عباسینی ردّ ائدن سپاهی،
یوخ عیبی، چیخارتسین آلتی شاهی

****

عالیمین گوشووه آل گفتارین،
سورما خاصیت ایله اطوارین.