غفلت ائتمیشدی منی دام بلادن فارغ

ای خوش اول دم کی، منیم عشق ایله کاریم یوخ ایدی،
بیم اغیار، کؤنولده غم یاریم یوخ ایدی.
گلممیشدیم هله من کتم عدمدن بیرون،
وادیی عشق بلاخیزه گذاریم یوخ ایدی.
عشق و عاشیق لیک ایشین بیلمز ایدیم عالم آرا،
دیل بیدرد ده اندوه و غباریم یوخ ایدی.
خار خاریم یوخ ایدی بو گول رعنا لر اوچون،
فکر نوروز، غم فصل باهاریم یوخ ایدی.
نظریمده یوخ ایدی جلوۀ حسن محبوب،
ذره جه آیینۀ دلده غباریم یوخ ایدی.
غفلت ائتمیشدی منی دام بلادن فارغ –
کی، حریم حرم قیدده باریم یوخ ایدی.

رشک آساییشیمه چرخ جفاکار ائتدی،
درد اوچون تا کی، عدمدن منی اظهار ائتدی.