تصویری شماخی نین وضعیتی نین

تصویری شماخی نین وضعیتی نین

ساقیا، ای بت گول چهره، گلیر فصل باهار،
مئی گولفامی گتیر، موسم عشرت گؤرونور
روح جمشیدی قیلیب شاد، گتیر مئی جامین،
یئنه طبعیمده منیم طُرفه بشارت گؤرونور.

وار امیدیم، یئنه گول لر آچیلیب یاز اولاجاق،
بولبول سوخته دل لر یئنه دمساز اولاجاق،
چوخ اولوب جیش و طرب، محنت و غم آز اولاجاق،
آچیلیب لاله وگول، گؤر نه لطافتی گؤرونور!

نئچه ایللردی کی، شیروانه گلیب رنج و عذاب،
اولدو چوخ کیمسنه‌لر زلزه له دن خانه خاراب،
کیمیا کیمی اولوب راه مداخل نایاب،
نئچه مدتدی کی، بو اهلده عسرت گؤرونور.

شهر شیروان ایدی قافقازده هر اؤلکه یه باش،
خلقی نین کؤنلو هامی گئن، اوزو گول تک بشّاش،
قحطدن، زلزه له دن بیزلره تنگ اولدو معاش.
ایندی بیزلرده نه بیر مال و نه ثروت گؤرونور.

قحطده، زلزه له ده عسرتیمیز گؤردو اعیان
امپراطور معظم بیزه قیلدی احسان،
نقد پول،مهلت توجی، بم عطا ائیله‌دی نان،
فی الحقیقت کی، بو دولتده سخاوت گؤرونور.

حق ائده ثانی آلکساندرا دایم رحمت،
ایله سین منزل و مواسینی باغ جنّت،
وئرمه سین ثالث آلکساندرا هرگز آفت
کی، بو اولادده آثار عدالت گؤرونور.

شهر موسکودا بو ایل کیم، او سراج و وهاج
مای آییندا قویاجاق عزت ایله باشینا تاج
گرچی خورشید جاهان تاجه دئییل دیر محتاج
پادشه لرده و لاکین بئله عادت گؤرونور.

اودو شاهنشه جان، تاجی عدالت دیر اونون،
کمری قوت حق، تختی فراست دیر اونون،
لشکری فوج ملک، یاوری قدرت دیر اونون،
هر یئره عزم ائله سه، فتح ایله نصرت گؤرونور.

هاردا اولسا او شهه بیر نئچه بدخواه و بخیل،
حق تعالی ائده جک گئیدلرین فی تذلیل،
یاغدیریر طیر ابابیل او قومه سجیل،
اسف ماکؤونده اول قومه خسارت گؤرونور.

او زامان کیم، قویاجاق تاج بو شاه دنیا،
اولاجاق دیر مَنَفیس، ائیله یه جک لطف و عطا،
بار ایلاها، بیزه ده شفقتین ائیله اجرا.
هامی دان چونکی بیزیم اهلده ذلت گؤرونور.

بیر طرف زلزه له دن ائولریمیز اولدو خراب،
بیر طرف خلق باهالیقدا یانیب اولدو کباب،
بیر طرف گئتدی قوبئرنا، ایشیمیز اولدو عذاب،
مختصر، بیزده‌دی عالمده هر آفت گورونور.

بو هامان شهردی کیم، آدلانیر ایدی شیروان،
بوندا شیروان شهی لر توتدو سعادتله مکان،
اخسیتان شاه، خلیل شاه، او شاه خندان،
باخ تواریخ لره گؤر بیر نه حکایه گؤرونور.

مرکز دایرۀ جمله ولایت دیر بو،
حاصل آور یئری، شیرین سویو شربت دیر بو!
کیم باهارین گؤرن آدم، دئیه جنّت دیر بو،
نه گناهی وار اونون؟ سؤزده لیاقت گؤرونور.

شهریمیز آب و هواده قویوب عالم لری مات،
باکی شیروانه برابر اولا بیلمز، هئیهات
مثلین عیبی ندیر “بیر اولومو ائششگ و آت…”؟
بیر مثل دیر، نه کی بیر اؤزگه عداوت گؤرونور.

وار اونیم پیس لیگینه جمله اطباده ثبوت،
قیشدا اعراف صفت، یایدا “مثال برهوت.
مطلبیم هچو دئییل، بیل کی، بو معنادا، سکوت،
دوغرو سؤز آجی اولور، حق مرارت گؤرونور.

باکی نین شهر شماخی کیمی سامانیمی وار؟
یا کی شیرین سویو، بیر باقی گولوستانیمی وار؟
کَرک و تئیهوسیمی، یا سونبول و ریحانیمی وار؟
اوندا بیر نفتدن اؤزگه نه علامت گؤرونور؟

وار سرشته‌لری لوبرایله لنگردن
دولودور ساحل مقصودلری گوهردن،
بیر جهتدن باکی افضلدی هامی کشوردن
کی، صغیرینده، کبیرینده دیانت گؤرونور.

بیزده یوخدور، وار اولاردا نئچه یئر شئی خواص،
صاف دیل کیمسه‌دی لر کیم، هامی سی مؤمن خاص،
آری از بخل و حسد، شیعۀ صاحب خلاص،
او جماتده هامی غیرت ملت گؤرونور.

بیز گرک دیر ائیله یک شرح اؤز احوالیمیزی،
نه گرک باکی سوزو، داغیدالار دالیمیزی،
دؤندریب تانری کی، ادبار ائدیب اقبالیمیزی،
اختر بختده مدتدی نحوست گؤرونور.

بیر یامان درد بودور نازل اولوب تازه بلا،
ایسته نیر تؤیجو پولو، خلق قیلیر واویلا!
گلدی بوی چیخدی، قالیب یئرده فقیر و فقرا،
فقرا قومینه بیر تازه قیامت گؤرونور.

گؤردو دولتلی کی، شهر اهلی قالیب سرگردان،
نئچه دفعه بیزه پول، بوغدالار ائتدی احسان،
برج دان چیخمامیشیق بیز هله، چیخدی فرمان،
بیلمیرم بیزده نه دولت و نه ثروت گؤرونور؟!

امپراطور بو احوال دن اولسا حالی،
راضی اولماز کی، پریشان اولا خلقین حالی،
ای “ضیا”، یاز غزئته، شرح ائله بو احوالی،
سنه، ای کان ادب، خلقده منت گؤرونور.

ایوان اوف گونده ییغیب خلقی قیلیر حکمون عیان
کی، گرک دیر وئره سیز تؤیجو پولون، وئرمیر آمان،
نه قدر عجز ائدیریک، یالواریریق نوهَکونان
اولماییر هیچ رضا، باشقا کدورت گؤرونور.

انتخاب ائیله‌میشیک دؤرد نفر اهل حالی،
کورساکوف – دوندوکواف شرح ائده‌لر احوالی،
وار امیدیم کی، اگر حال دن اولسا حالی،
ائده جک رحم کی، ذاتیندا مروت گؤرونور.

بیری سی محمود آغا دیر، بیری سرکار حسن،
بیری سی حاجی علی عباس، اعلا مستحسن
و آلئکسان لفی اوف حالی بولاردان، احسن،
فی الحقیقت کی، بو دؤرد کسده حمایت گؤرونور.

بولار اؤز خرج لری ایله گئده جک مردانه،
ماسکوا، شهر پئتئربورقا، دخی هر یانه،
سالاجاقلار کیشی لر شهرین ایشین سامانه،
ایش بیلن شخص دو، بونلاردا فراست گؤرونور.

ایشه گئتمکده حسن بئی هامی دان مستثنا،
پول ایشینده لئلیوف دان اولاجاق درده دوا،
دیل ایشی اولسا اگر، لازیم اولور محمود آغا،
اوندا چوخ سرعت گفتار فصاحت گؤرونور.

فقرالر غمینه قالسا بو دؤرد شخص، خدا،
بونلارا نصرتینی نازل ائله صبح و مسا!
قورخورام ائیله‌مه یه بیر نئچه سی عهده وفا،
چونکی تن پروره بو امرده زحمت گؤرونور.

بیلورم کی، بیری سی بو ایشه بی شک گئده جک،
حسن اخلاق، کرم کانی حسن بگ گئده جک،
گئتمه سه هئچ بیری، آخرده اؤزی تک گئده جک،
چونکی ذاتیندا اونون همت و غیرت گؤرونور.

بیر نئچه امرده ثابت گؤرونوب آنده قدم،
ائیله‌دی آجلیق ایلینده نه قدر خلقه کرم،
جمع ائدوب اوشقولا اطفالی اوچون خیلی درم،
مکتب مجلسه اوندان گئنه همت گؤرونور.

چاریار عشقینه، ای پادشه ارض و سما،
بیر بیریندن دخی بو دؤرد نفری ائتمه جدا،
روب مسکونده وئر سن بولارا عمر بقا،
چون بولاردان گئنه آثار کرامت گؤرونور.

سیّدا، قورخما، بو دؤرد کس گئدر، انشالله!
آرزو نخلی وئر بیر ثمر، انشالله!
یئنو شیروانه قوبئرنا گلر، انشالله!
کوکب بختده بیر اؤزگه سعادت گؤرونور!

تا دوشه تؤیجو پولون وئرمه یه ایش سامانه،
یئنه مهلت اولاجاق بیر نئچه ایل شیروانه،
یا کی کئچمیش لری عفو ائیله یه جک شاهانه،
طبعیمه غیب دن الهام بشارت گؤرونور.