وئریب یغمایه عقل و هوشونو بختی قرا سیّد

معنبر کاکیلین کیم رشتۀ جان ایله توام دیر،
حبیبیم، هر تئلی جان بوینونا بیر قید محکم دیر،
منی روسوای عالم ایله ین اول زلف پرخم دیر،
وئریب تاراجه عشقین عقلیمی، مشهور عالم دیر،
دیل زاریم اسیر درد عشق و محنت و غم دیر.

منی شاد ائیله مز، ای گول، باهار و بوستان سنسیز،
حرام اولسون منه، ای دل روبا، عیش جاهان سنسیز،
مه وخورشیده باخسام بیر دم اولمام شادمان سنسیز،
جهنم مسکنیم اولسون، بهشته گر روان سنسیز،
دؤنر هجرینله کؤنلوم قانه گویا کیم، جهنم دیر.

مه گردون دئیل مهر عذارین کیمی رخشنده،
حقیقت، عارضیندن دیر مه وخورشید شرمنده،
معوّر عارضینده اول عرقدیرمی نماینده
و یا اولموش مه اوزره خوشۀ پروین پراکنده،
دوشوب برگ گول اوزره یوخسا اؤیله ایقد شبنم دیر؟

مسلسل سونبولون کیم، جاندا دیر یوز پیچ و تاب اوندان،
حفاظ ماهیدیر کیم، منکسیف دیر آفتاب اوندان،
مگر آذردی هجرانین، اولور عاشیق کباب اوندان،
وصالین کیمیا دیر کیم، دل اولماز کامیاب اوندان،
دهانین غنچۀ سیراب، لعلین سرّ مبهم دیر.

مکدّرخاطر اولما چوخ دا غمدن، بینوا سیّد،
حریم وصل دن محروم اولان، ای مبتلا سیّد،
مروت قیل، نگاریم، بونجا چکسینمی بلا سیّد،
وئریب یغمایه عقل و هوشونو بختی قرا سیّد،
دؤنوب مجنونه عشقیندن، جگرخون، دیده پرنم دیر.