منو
حکایت
حکایت
هارون الرشید کی، خلیفۀ باغداد ایدی، اونون عصرینده بیر نفر ارابی کی، صحرالاردا، شوره زار اولان یئرلرده نشو نما تاپمیشدی، مدت عمرونده بیر صاف اولان شیرین سو گؤرمه‌میشدی. بیر گون آذوقه تحصیلی ایچون وطندن چیخیب بیر اؤزگه دیارا متوجه اولموشدو. بیر پاکیزه اولان یئرده یاغیشدان جمع اولموش بیر گؤل گؤردو. بیر قدر او صاف سودان ایچدی، گؤردو کی، چوخ شیرین سودور. اؤز اؤزونه دئدی کی، یقین بو سو جنّتدن بو یئره تؤکولوبدور. دئدی:– عجب اولدی، بو سودان تحفه آپارارام خلیفۀ باغدادا، انعام و جایز آللام. بئله سو خلیفه گؤرمه‌ییب دیر.
بس ارابی او سودان تولوغون دولدوروب باغدادا روان اولدی. قضارا، ایکی آغاج یول باغدادا قالمیش، خلیفه خواصلاری ایله شکارا گئدیرکن ارایبیه راست گلدی. ارابی خلیفه نین جلالیندان بیلدی کی، خلیفه دیر. یول کناریندا
دوروب خلیفه یه دعا دیلین آچدی. خلیفه اوندان سوروشدو کی، یا اخی العرب، هانسی قبیله دنسن؟
جاواب وئردی کی، فلان قبیله دن.
دئدی هارا گئدیرسن؟
دئدی کی، سنین خدمتوه جنّت سویو گتیرمیشم.
خلیفه غلاما دئدی کی، بیر جام او سودان دولدوروب منه وئر.
چون خلیفه بیر جرعه او سودان ایچدی، گؤردو کی، گؤل سویودور، ارابی نین تولوغوندا قالیب داخی زیاده تعفن ائدیب دیر. جامی غلاما وئردی، بویوردو کی، بو سو حیف دیر، تؤک جام داکی سویو تولوغا و بو تولوغو ارابی دن آلیب گؤندر باغدادا و تاپشیر کی، بو سودان بیر کیمسنه ایچمه سین، تلف اولماسین.
بس اوزون توتوب ارایبیه دئدی کی، مندن نه خواهش قیلیرسان؟
ارابی دئدی کی، “خلیفة المسلومین هاذا ماعول جنّتی”، سنینچون جنّت سویو گتیرمیشم، گرک منه یوز قزل پول وئره سن.
خلیفه یوز قزل پول اونا وئردی. ارابی شادمان درحال قبیله سینه شتاب قیلدی.
عیان حضرتدن سئوال ائتدی لر کی، یا خلیفه، بوندا نه حکمت واردی کی، جنّت سویوندان بیزه بیر قطره وئرمدین؟ اونی ساخلاماقدا مبالغۀ زیاده بویوردون؟ باغدادا گؤندردین و ارایبیه انعام ائدیب ال الاجاله مراجعتینه تأکید ائله دین؟
خلیفه جاواب وئردی کی، بو ارابی کی، فلان قبیله ده اولور، اول سرزمین بیر شوره زار اولان کثیف یئردیر. بو عرب مدت عمرونده بیر صاف و شیرین و جاری اولان سو گؤرمه‌ییب دیر، بیاباندا یاغیشدان جمع اولان سویو گؤروب، جنّت سویو حساب ائدیب، منیم ایچون انعام امیدی ایله تحفه گتیریب دیر. من ایچدیم، گؤردوم کی، چوخ متعفن، ناگوارا سودور. سیزه کی، اوندان بیر شوربه وئرمه دیم، قورخدوم کی، ایچه بیلمه‌ییب بیر سؤز دئیه سیز، ارابی نین داماغینا دیه و او کی تاپشیردیم کی، هئچ بیر کس بو سویا دیمه سین، بو فیکیرله اونی دئدیم کی، ارابی خاطرجمع اولسون کی، اول سو نهایتده منه خوش گلیب دیر و اول کی ارایبیه انعام ائدیب اؤز قبیله سینه مراجعتینه اسرار ائله دیم، اوندان اؤترو ایدی کی، ارابی، معلوم اولور کی، باغداددا جاری اولان نحر عظیم دجله نی گؤرمه‌ییب دیر، تا باغدادا گئدیب دجله نی گؤروب خجل اولماسین.