منظومه

منظومه

شکرلله کی، یئتیشدیم کامه،
مشکریز اولدوم بیازه خامه.
حال مخلوق ازل اولدو بیان،
جان بی جانه گتیردیم عنوان.
بیر نئچه دؤورلر اتمام اولدو،
گرچی محنتله گونوم شام اولدو.
بیر طرف دغدغۀ فکر معاش،
بیر طرف وسوسۀ سعی و تلاش.
بیر طرف دن غم هجران نگار،
بیر طرف جور سپهر قددار.
گئجه‌لر رشتۀ جانیم یاندی،
شمع تک روح روانیم یاندی.
وقت کیم، منزلینی اولدو خالی،
دوشدو یادیمه نگارین خالی.
خالمی نقطه گؤروب یاد ائله دیم،
نقطه دن خاطریمی شاد ائله دیم.
قصۀ آدمی ائتدیم تحریر،
شئیسین احوالینی قیلدیم تسطیر.
اولدو تحریر صفات ادریس،
او کی، حکمت لر ائدردی تدریس.
صالح و هود حکایه لرینی،
سؤیلدیم جمله روایت لرینی.
ائیله‌دیم قصۀ قابلی بیان،
محنت و کوربت هابیلی عیان.
گلدی اظهاره خلیل الرحمان،
نقل نمرود انود اولدو عیان.
نقل شدداد شدید ائتدی ظهور،
قویمادیم قصۀ بابیلده قصور.
بت شکن اول شه دوران اولدو،
حضرته نار گولوستان اولدو.
ای خدا، دردیمه درمان ائیله،
آتش هیجری گولوستان ائیله!
ماسوا حُبّینی دلدن پاک ائت،
کؤنلومو آیینۀ ادراک ائت!
کعبه قویما کی، بتخانه اولا،
دیل گرک منزل جانانه اولا.
بیزه بس عشق خداوند احد،
“لا شریک له الله صمد”،
مصطفی حاقینا، ای بار خدا،
شرف مرتبۀ آل ابا
سیّدی ائیله‌مه محشرده ذلیل،
چون اولوب عترت زهرایه دخیل.
بیر اوزو قاره قولون دور بو فقیر،
عفو قیل، هر نه ائدیب دیر تقصیر!