منو
احبّانین رجاسی
احبّانین رجاسی
نه اولور، ای ادیب اهل جاهان،
ائده سن پندیمی قبول الان،
چکه سن شیوۀ غزل دن ال،
غزله قویماییر غزال محل.
بسدیر ائتدین بو دکلی شعره هوس،
شعری آلماز شیره اصلا کس.
احتراق ائتدی کوکب شعرا،
بی اثر دیر عطارید و شیرا.
سد اکبر قالیب سعادتدن،
سد اصغر دوشوب کرامتدن
کوکب مشتری وباله دوشوب،
آفتاب صفا زواله دوشوب.
اهل عزت جاهاندا خوار اولوب،
قصر نادان زرنگار اولوب.
هوشه گل، مردوک زامانی دئییل،
دخی بی دردلیک زمانی دئییل.
اولما بیکار، اول مباشر کار،
گرچی بی مشتری قالیب بازار.
یوخ متاع هنر خریداری،
سالدی گردون کساده بازاری.
دئمه اشعار، رسم شعری اونوت،
ایندی سن بیر طریق دیگر توت،
نه اولور نقل انبیای جاهان،
اولا طوری کی دلینده خلقه بیان؟
جمله اطفال ترک و شاد ائده سن،
اؤزونه هم جاهاندا آد ائده سن.
قالا عالمده یادگار سؤزون،
اولا روشن بو ماجراده گؤزون.
سؤزو اول یارین ائیله‌دی تأثیر،
نئجه کیم، مئی دیله وئریر تشویر.
سان مسیح ایدی اول ملک سیما،
ائیله‌دی مرده کؤنلومو احیا.
قیلدی ترغیب اول فرشته نهاد،
اولدو روح القدوس منه استاد،
اولدو تعلیم آدمه اسما،
سنه هراد اولسون، ای ایلاه سما!
پیر ایدیم، طفل اولدو استادیم،
فیض حق دن یئتیشدی امدادیم
بادۀ نطقی ائتدی مست منی،
ائیله‌دی امره پای بست منی.
ائیله‌دیم شعره حاله بس اقدام،
ائیله‌دی اونی قادر و اعلام.
بو حکایه‌لر انبیادن دیر
شرح اولوب “روضه الصفا”دن دیر.
بی کم و بیش ائتمیشم تحریر،
وئرمدیم هیچ نکته یه تغییر.
جمله بیر قومه کیم، اولوب هاوی
دئدیم: “اَلْ عُهدَتُ اَلْراوی”*.
———————————-
* بابالی دئیه نین بوینونا.