لنکرانلی شیر علی بئی یه

لنکرانلی شیر علی بئی یه

حلقۀ زلف سیه رخسارۀ جانانده،
عقرب جراره دیرمهتاب نور افشانده.
ائیله بیللم کؤنلومو هار دمده بیر عقرب چالار،
هر دقیقه گؤرجک اول زلفی رخ جانانده.
آیدا بیر یول منزل ائیلر ماه عقرب برجونو،
گؤرمه‌میشدیم عقربی دایم مه تابانده.
خاطریم درهم اولور ساعت به ساعت کیم، نئچون،
عقرب زلفون حدیثی سؤیلنیر هر یانده.
باشیمه گور چرخ دن داشلار یاغارسا راضییام،
گؤرمه ییم تک اول شهی اغیارایله جولانده،
سنگ محنتدن سینیر صدپاره کؤنلوم شیشه سی،
شیشه و پیمانه گؤرجک یار بد پیمانده.
زوفوون زنجیرینه دیوانه کؤنلوم باغلانیب،
سال زنخدان چالما، بند ایله بو زندانده.
چوخ گتیرمه سن منی افغانه کیم، گونّز روا،
همتی شیر علی هردم منی اتگانده.
اول جاهان جود کیم، دست سخاسیندان اونون،
قالمادی مدنده زور، دُرّ و گوهر عمّانده.
رشک کیلکیندن دؤور چرخ سیندیردی قلم،
چون اونی کامل گؤروب، گؤردو اؤزون نقصانیده.
اول امیر خطۀ لنگرکونان کیم، هر زامان،
اهل شیروان بنده سیدیر ریبقۀ فرمانده.
ای سپهر عزت و رفعت، بو گون مهرین سنین
سنگ آرا آتش کیمی مضمردو جسم و جانده.
مندن ائتمیشدین تمنا بیر نئچه شیوا غزل
کیم، نظیری اولماسین عالمده بیر دیوانده.
گرچی دوشدو عقدۀ تأخیره بیر مدت بو ایش،
بو گونه مندن دئییل، وار چرخ کج گردانده.
من هاچان شیرواندا قالدیم کیم، ائدیم خدمت سنه؟
اولموشام گه رشت ده، گه خطۀ تهرانده.
هر زامان کیم، شهرده گؤردوم اوزاقدان من سنی،
شرمدن قاچدیم کی، تا پنهان اولوم بیر یانده.
ائیله بیل، بیر صید صیاده اولور غافل دوچار،
ناگهان بیر گون دوچار اولدوم سنه میدانده.
گرچی حقین وار ایدی، ائتدین مذمت بس منه،
وار مذمت لر یئری بو سیّد نالانده.
سن بویوردون کی، منه، ای سیّد بی اعتبار،
بو نئجه اطواردیر سن تک اولودون شانده؟
بئش غزل ائتدیم تمنا سندن عاید اولمادی،
آلتی آی قویدوز منی آواره بو دورانده.
اؤزگه وقتی شعریوی فیلفیل بوکر عطارلر،
کهنه دفترلر کیمی هر پاره بیر دکانده.
بیر مثل دیر کیم، پیشیک گؤردو … درمان دیر
…پنهان ائیله‌دی گوللوک آرا کولخانده.
خود توتوم کیم، سؤزلرین یانیمدا مثل زریدیر،
ذره اولماز قدر و قیمت تا کی واردیر کانده.
سؤز گرک سندن چیخیب، عالمده شهرت ائیله سین،
زیره نین مقداری اولماز خطۀ کیرمانده.
هیچ عاقل ساخلاماز اؤز گوهرین صرافدن،
سیّدا، وارمی سؤزون بو سوردوغوم برهانده؟
سن کی، حاصل ائتمدین مقصودیمی، گل ایندی سن،
بیر شئی ائت مندن تمنا اولماسین شیرواندو.
بو کلامیندان سنین معلوم اولور، ای تاج سر،
سیّد ناکامه میلین وار سنین احسانده.
من نه لازیم ایستییم بیر شئی کی حق دیر، اولماسین،
فرقۀ اهل کمال ایچره، قالام نقصانده.
دقت ائتسن شعرینه، ظاهردو فکری سیّدین،
ساعت اسبابین کی، مونجا ذکر ائدیب عنوانده.
گاه شیشه، گاه عقرب، گاه ساعت دیر سؤزو،
مطلبین ائتمیش عیان بو نکتۀ پنهانده.
شفقتین گر اولسا، بیر ساعت عطا قیل سیّده
کیم، گؤروب آنی، سیزی یاده سلام هر آنده.
نه او ساعت اولماسین کی، هر گدانین وار بیری،
نه او ساعتدن کی، واردیر شاه ده، سلطانده.
مختصر، بیر ساعت اولسون کیم، گؤرن کس لر اونون،
آدینا ساعت دئسین لر مجلس عرفانده.