اجی احد مطلیب زاده یه

حاجی احد مطلیب زاده یه

نوباهار اولدو، کؤنول، دهری توتوب ذوق و صفا،
گئیمیسن کعبه کیمی سن نه اوچون بؤیله قرا؟
باشینه غنچه قویوب برگ زمرددن تاج،
اینینه لاله گئییب عزت ایله سرخ قبا.
خلوت خاص زلیخادی مگر صحن چمن
کی، گولون خار جفا پیرهه نین قیلدی قبا؟
تؤک مرصع قدحه بادۀ خورشید وشی،
آفتاب ائتدی حمل برجونو، ساقی، مأوا.
حَمَل له گلدی بو گون آهوی زار فلک،
ائتدی بی چون و چرا گؤر کی، بو مرتع ده چرا.
هفت سین ایچره بو اسناده سمک لازیمه دیر،
هوتدن چونکی اولور یونس خورشید رها.
عالم پیر بو گون اولدو جاوان، ای ساقی،
ایلشیب عیش و نشاط ائتمه یه پیر و برنا.
بولبول اظهار قیلیب حنجرۀ داودی –
کی، سالیب شورایله بو چرخ حصارینه نوا.
زاغ ائدیب ترک ابولچپ کیمی آهنگ چپی،
راست سرو اوزره چیخیب قمری اولوب نغمه سرا.
اوخویور لحن حجاز ایله پرستو نغمات،
ائیله ییر لحن هودی هودهود گولزار صبا.
روز نوروز ائدیب دکۀ عطار گشاد،
عالمه عطر وئریر لخلخعۀ باد صبا.
بولبول زار گولون حسنونه قالمیش حیران،
حق تجّلاسینا مبهوت قالان تک موسی.
گول آچیب چهره سینی عارض اسحاق کیمی.
ساچیلیر هر طرفه نفخۀ مشک سارا.
عرض بابیلدی چمن، بولبول بی دل یعقوب،
لاله و گول بیری “راحیل” و بیریدیر “لیّا”.
لاله نین رنگی شفق کیمی باسیب دیر سورخی،
عرض اقدسده عیاندیر یئنه خون یحیی .
نفس عیسوی آثارایله باد سحری
ائدر اموات گولستانی بو گون لر احیا.
صحن گولشنده اولور جنّت مؤعود عیان،
عالم رجعت اولوب دهرده هر یان پیدا.
نفخۀ سوردو گویا نفس باد سحر،
نفخ اولوب سوره بو گون، زنده اولوبدور موتا.
غنچه یه مژدۀ اسحاقی وئریر روح الامین
کی، ائدر خنده تعجبله لسان سارا.
برق نوروز تؤکوب فصل زمستان قانین،
نسب سلطان گوله باغده اولدو شعرا.
قیش گئدیب گلدی باهار، اولدو عیان وجد سرور،
ای کؤنول، شاد اولوسان رمز ایله اولسان دانا.
عقدۀ رأس زنب دن قوتاریب ماه منیر،
شوکر کیم، رفع خوسوف اولدو، وئریر دهره ضیا.
شاد اول، ای خاطر غم دیدۀ مغبون کی، بو گون
عالمی شور توتوب، وجده گلیب ارض و سما.
روش شعرده استادلیق ائیله ظاهر،
موشکافان جاهان تا کی دئسین “آمنّا!”.
اومنای بلد اوچون اوخو بو اشعاری،
سنه انعام ائله سین تا کی او فخر اومنا.
هر نه مقصود دلین دیر، سنه انعام ائیلر،
حاجی عبدل احد، اول پشت و پناه فقرا.
طالب حقه‌دی مطلوب مطلب زاده،
طالبین مطلبی مقصودینی ائیلر القا.
او جاهان بخش کی، انانی نین ائیلر شوکرون،
هامیی سیّد سادات و گروه علما.
زاییر کعبه اولوبدور او بلند اختر کیم،
اونون احسانینا گؤز دیکمیش عموم فقرا.
مخلس مجتهد عصر، مرید حاصل،
چاکر آل پئیمبردی، محب آغا.
تا علی نورینی رخسار علی گو گؤرموش،
مهو اولوبدور نئجه کی، مهر شعاعنده سوها.
چوخلاری اولدو روان، تورفه اونون تک، لاکین
چوخلاری گئتدی بو ایل حجه اونون تک، اما…
بیری سی ائتمه‌دی بیر مرد فقیره انعام،
بیری سی ائتمه‌دی بیر بیوۀ بی یاره عطا.
لیک بو آچدی گئدن وقت سعادت الینی،
ائتدی هر بیر کسین اؤز حالینا شایسته سخا.
هر کسه درهم و دینار وئریب، مال و منال،
هر فقیره کسیلیب قسمت اولوندو کالا.
جمله سی اولدو گلندن سورا معلوم بیزه،
نه قدر یثروب و بطحاده ائدیب دیر عطا.
بئله گئتسین گئده جک کیم کی، طواف حجه،
بو صفت گئتمه یه جک دیر دخی بیر کس، حاشا!
گرک آثاری بونون دهرده تاریخ اولسون،
قالا باقی آدی تا وار بو دنیایه بقا.
مکه دن گئتدیگی سوقاتی گلئیدی اله گر،
اولاجاق دیر بیلیرم بنده یه بیر مصری عبا.
لیک، بختیم منه یار اولمادی، قالدیم عریان،
پوزدو من ائیله دیگیم قویۀ تدبیر قضا.
هیچ شک یوخ، بیلیرم کی، او سخاوت کانی،
یئنه لطف ائیلر اودا حاجی رضا اولسا رضا.
حاش لله، دئمرم حاجییا من مانع خیر،
خاص بیر شخصه کی، من تک اولا بیر برگ نوا.
خاصه بیر شخص کی، مداحی اولا آغانین.
ائیله یه آل علی وصفینی هر صبح و مسا.
خیرخواهیمدی منیم حاجی رضانی بیلیرم،
زینت قافییه دن اؤترو بو سؤز اولدو ادا.
راستلیقدان بو سؤزو تئیبت اوچون نظم ائتدیم،
کج خیال ائتسه اگر حاجی، منه وا اصفا!
حاش لله کی، مرادیم اولا بیر اؤزگه خیال،
مخلسم حاجییا، بالله کی، بی ریب و ریا!
چونکی معلومدو مشدی علی یه احوالیم،
وار امیدیم کی، وئره آیینۀ قلبه صفا.
یعنی تفسیر قیلا سؤزلریمین معناسین،
توتمایا سیّد سرگشته یه شعرینده خطا.
مورده شیرزاده اگر آنناماسا مضمونو،
عیبی یوخ، دوبه دو، یوخ ذهن ایله هم فهم و ذکا.
او نه بیلسین کی، ندیر وصف امیر البَرَره،
او نه بیلسین کی، ندیر مدحت سلطان هودا.
او نه بیلسین کی، ندیر نظمده سنگین مطلب،
او نه بیلسین کی، ندیر شعرده رنگین معنا.
سیّدا، بسدی زرافت، سیناجاق دیر بو حریف،
موللاسان سن ده، بلی، دوبه بیلن دیر موللا.
بار ایلاها، اولا حاجی احدین عمرو دراز،
ساخلاسین جمله بلادن اونو دایم مولا!