محسن بئی یه

محسن بئی یه

ایام باهار اولدو، آچیلدی گول و لاله،
آلدی گول و لاله اله باغ ایچره پیاله.
بو موسم اگر، ساقی، دئییل موسم عشرت،
بس جام نه دن دیر کی، آلیب دستینه لاله؟!
گر باد باهاری دئییل عیسی، نه سبب دن
یوز نطق فرح بخش وئریر بولبول لاله؟
ترلر، نئجه کی، عارض معشوقه حیادن
هر صبح گول اوسته دوشر اول نوع ایله ژاله.
محبوبه یانیندا نئجه کی، یالواریر عاشیق،
بولبول گولو گؤرجک ائدیر اول نوع ایله ناله.
تأثیر باهارایله اولور شیمدی تناور،
سرما ایله هر نخل کی، دؤنموشدو اوفاله.
دومالر اوخور گاه اشیران، گه ابولچپ،
گاه شکل مثلث، گاه اورار جمله سی حاله.
گولشنده قیامتدی کی، بو خاک دن، ای دل،
گول لر گؤتوروب باشینی، احسنتُ، بو حاله!
گولشندن عیان اولدو یئنه جنّت موعد،
صنع ازلی یئتدی گولوستاندا کماله.
گه باد چکر طرۀ سونبول لره شانه،
گه قازه‌لر ائیلر ید قدرت گول آله.
عاشیق تکی نرگیس گؤزون آچمیش نیگران دیر،
گویا کی، آلیب صبرین اونون بیر گؤزو آله.
گول بولبول شیدایه ائدر عرض جمالین،
بیر آل ایله ایستر کی، اونون کؤنلونو آله.
گول دور عرق روی محمد، گولو گؤرجک
گؤندر صلوات احمد مختارایله آله.
مافاته مکافات قیلیب باد باهاری،
تدبیر ائلییر ماضی و مستقبل و حاله.
گولزاری زمستاندان آلیب وئردی باهاره،
یازدی خط ریحان ایله بیر نغز قباله.
خوشبخت او کس لردی کی، بو فصلده هر گون،
گولشنده اولا همنفسی جام و پیاله.
خوشبخت او کس لردی کی، بو گردش گردون
ائیلر اولارین قسمتینی عیشه حواله.
هرچند منیم دسترسیم یوخدو بو کامه،
بیر کان سخالیک گلیر فکر و خیاله.
بیر کان کرم، کهف امم، نوگول اقبال،
محسن بئی فرخنده شییم، “دامه جلاله!”*
بیر تازه جاوان دیر کی، دخی بختی جاوان دیر،
یئتسین گؤروم اول خیضر تکی دهرده ساله.
خورشید جلالین فلک شبعده گردان،
ای بار خدا، وئرمه سین عالمده زواله!
آب کرم و لطف خدا، گرد ملالی،
پیوسته قیلا دامن عیشیندن ایزاله.
ای بار خدا، عالم آرا باد حوادث،
دهر اولدوقجان اَسمَه سین اول تازه نهاله.
بخشایش ایله خصم ائدر اول خصم زبانین،
اعدالرایله حاجتی یوخ جنگ و جداله.
صاحب کرما، گرچی بو عالمده فقیرم،
امّا نه فقیری کی، دوشم ظل سئواله.
طبعینی کی، قناعت ائلییر بیر قدک ایله،
یوخدور هوسیم عالم آرا اطلس و شاله.
گرچی گئیرم شال، اگر ممکنوم اولسا،
امّا نه دوشوم، اولماسا گر، فکر محاله؟
بئی لر کیمی هرچند منیم شال دونوم یوخ،
نه شوهره بو گون ناییبام، آخر نه ماهاته.
هر کس کی، توتا بئئ اتیین، بئی اولور آخر،
شیرین اولور آغزی، دیر هر کس الی باله.
صد شوکر کی، سیّد توتوب اول دامن پاکین،
امیدی بودور کیم، گله لطفونله کماله.
————————————–
* جلالی ابدی اولسون!