حاجی مهدی یه

حاجی مهدی یه

گتیر پیالۀ مئی، ساقی، سلسبیل گرک،
شراب ناب اولا بزمده سبیل گرک.
ائدر بیر ایکی خوم اولسا منه شراب کفاف،
بو رند مئی کشه پیر مغان کفیل گرک.
محافظت قیلا شاید منی بو سرمادن،
سالام اؤزومو خرابات آرا دخیل گرک.
شراب آذری تؤک جامه، ای بت آذر،
بو ناره گیننه یه بیر من کیمی خلیل گرک.
گتیر پیالۀ بلورده مئی صافی،
جمال بارییه آیینۀ جمیل گرک.
شراب نابدو بیر وحی، من پئیمبر عصر،
بو وحیه ساقی گول چهره جبرئیل گرک.
شراب شوربونو من ائیله ییرسه شرع رسول،
شراب نابه بو موسمده بیر بدیل گرک.
علیل ائدیب منی، ساقی، زمانۀ فرتوت،
علاج قیل کی، دوای تن علیل گرک.
گرکدی کیم، گتیره قوته تن زاری،
شتا زامانیدو، معجون زنجبیل گرک.
دخی بو مرحله ده قالماییب سخا اهلی،
بیر اؤزگه سمته بو ویرانه دن رحیل گرک.
نه خوشدو قاف قناعتده اولماغا عنقا،
نه قال جیفۀ دنیا اوچون، نه قیل گرک.
بو درد فقرین علاجی زمانه ده اولماز،
اؤزو علاج ائیله یه خالق جلیل گرک.
بو بار منت دونانی چکمه یه، ای دل،
سنین ایشین دئییل، اول باره زور فیل گرک.
گرکدی منعیم اولان خلقه ائیله یه احسان،
گرکدی آدم اولان اولمایا بخیل گرک.
دئدیم عبا گتیر مکه دن منه مهدی،
توخونمویوبدو عبا مکه ده بو ایل، گرک.
مگر کی، مکه طرف مصردن عبا گلمز،
اولوبدو خشک بو ایللرده رود نیل، گرک.
گؤروندو مکه طرف باغلانیب یولو شامین،
حجازه، غافله یه باغلانیب سبیل، گرک.
دئدین عبا یوخ ایدی مکه ده ایناندیم من،
بو قول حقه نه اثبات و نه دلیل گرک.
عبانی قطع ائله‌دیم بیر عدد سان کورکه،
هوا سویوقدو، منه کورک اردبیل گرک.
دئسن کی، یوخدو شماخیده اردبیل کورکو،
بو باره ده دخی بس گفتگو تاویل گرک.
دئدین تاپیلمیر عبا مکه ده اینانمالیدیر،
شماخیده تاپیلیر کورک هر قبیل گرک.
اودا تاپیلماسا، اوچ آرشین ائت دراپ عطا،
منیم تک اوشکولا موللاسینا شئنیل* گرک.
دراپی لطف ائله، ائتسین دلیمی لال خدا،
دئسم کی، آستار اوچ آرشین اونا فئنیل† گرک.
بو خواهشی ائدیرم بؤیله مرد و مردانه،
همیشه شاعر اولان اولمویا مُحیل گرک.
فدا اولوم سنه، ای مهدی وفا پرور!
یانیندا اولمویا بو سؤزلریم ثقیل گرک.
گرکدی من بورونئیدیم عبای احسانین،
گؤروب اولئیدی او دشمن لریم ذلیل گرک!
مثلدی کی، کیشی آری، کوثر اومان یئردن،
عدالته اولاسان مرد بی دل گرک.
هر ایل گلنده شماخییه شهر ماسکو دان،
ائدردین اوندا عطا تحفۀ جزیل گرک.
نه اولدو مکه یه گئتدین، کسیلدی احسانین،
اگر چوخ اولماسادا، تحفۀ قلیل گرک.
اگر دئسن کی، بلی، فاسقه سخادو حرام،
بو ادعانی ثبوت ائتمه یه دلیل گرک.
منی گناه ائله ین گؤرموسن نه یئرده گؤره ک؟
کیشی گؤزویله گؤره سورمه داندا میل گرک.
بو قدر بیل کی، سنه مخلسم صداقتده،
نه کورک تازه، نه ماهوت، نه زیبیل گرک!
بو سؤزلری سنه من یازمشام زرافتچون،
محب لر اولا احیا، عدو قتیل گرک!
هیجای خسموه بیر ازریل دیر قلمیم،
آلا مخالفییون جانین ازریل گرک!
———————————
* شینئل
† فلانئل