عبدل علی بویاقچی زاده یه

گلدی نوروز، مزیّن ائله‌دی دورانی،
گتیریر باغه یئنه سرو گول و ریحانی.
آچیلیر باغده گول عارض دلدار کیمی،
اوجالیر بولبولون افلاکه یئنه افغانی.
نرگسین جامینا ژاله تؤکولور باده مثال،
الینه فاله آلیر اول قدح مرجانی.
خوان وصلین گول آچیب، بولبولو ائیلر مهمان،
خوشدو معشوقه سی نین عاشیق اولا مهمانی.
خلوت خاص زلیخایه دؤنر صحن چمن،
غنچه نین چاک اولو پیراهنی نین دامانی.
قطرۀ ژاله نی هر کس گؤره برگ گولده،
آل والاده گؤرر یوز گوهر غلطانی.
زاهدا، صومعه دن دیشرا چیخیب، گل باغه،
بیر تماشا ائله سن کارگه صبحانی.
صنع مشاطۀ قدرت گولو ائیلر زینت،
باخ گول احمره، اول حکمتی نین حیرانی.
دولدوروب لاله مئی ژاله ایله ساغرینی،
یعنی مئی شوربونه تکلیف قیلیر پنهانی.
صحن گولزاره سحر وقتی اولور قالیه باد،
یار تک سونبول آچار طرۀ مشک افشانی.
گتیریر باد باهار طبلۀ عود و عنبر،
تا منبر ائله سین بادیه یه امکانی
آفتاب ائتدی هومل دن بو گون اظهار ضیا
کی، ضیاسیندان اولوب جمله جاهان نورانی.
دؤنه چک بولبول خوش لهجه نگهبانه یئنه،
بزم پردرده ستالر وئره جک الحانی.
باربدون اولاجاق نغمۀ ساری شیرین،
خسروون بزراینه نسبت قیلاجاق بوستانی.
گله جک سئیر چمن ائیله‌مه یه گولروخ لر،
گؤرن اونلاری بهشت ایچره گؤرر قیلمانی.
ای خوش اول عاشیق شیدایو کی، بو موسمده
همدم جان حزینی اولا اؤز جانانی.
کیم کی، جانانی اونون یوخدو بئله موسمدا
ائله بیلسین کی، اونون جسمده یوخدور جانی.
ای خوش اول رند قدح نوشه کی، واردیر یان،
چکمه ییر سن کیمی هرگز او الم هجرانی.
بو صفت من ده بو عالمده ذلیل اولماز ایدیم،
منده اولسایدی اگر مال و منال امکانی.
نه ائویم وار، نه اوتاغیم، نه پولوم، سیم و زریم،
نه ربابیم، نه کوبابیم، نه مئی رمّانی.
نه امید ایله گلیب یار منه یار اولسون،
قاچاجاق، گلسه، آجیندان دوداغیمین قانی.
ائیله مز شعریمی بیر حبه شیریجه حساب،
نه چیخار شعر و غزلدن، نه دئییم من آنی؟
نفرت ائیلر غزلیمدن او غزال رعنا،
گر دئییم وصف خط مشکینه بیر دیوانی.
گئر دئسم سیّد آه نصبم، خمسونو وئر،
سؤیلیر کیم، بو قدر فاش ائلمه هدیانی.
خمس لازیمدی کی، اول مجتهد عصره چاتا،
آلا، سیّدلره تقسیم ائله ییه عرفانی.
سن هارا، خمس هارا؟ بیر بو سئوالیندان اوتان،
سن تکی رنده وئریر خمسونو بیر مستانی.
گر دئسم، قوی اوزوو بیر اوزومون اوسته منیم،
سؤیله یر، لکّه لی ائتمه بو مه تابانی.
دئدیم: ای شوخ، سنه یار وفادار منم،
دئدی: کیم یار ائله‌ییب دیر ملکه شیطانی؟
دئدیم: ای سرو، گولومسن، سنه من بولبول زار،
دئدی: بایقوش کیمی گئت، منزل ائله ویرانی!
من گولم، سنده ولی بولبوله یوخدور نسبت،
سنی تاری، اؤزوه باغلاما بو بهتانی!
سنده بولبول کیمی واردیرمی گؤزل صوت و صدا؟
بولبولون قاشدی بو عالم لر آرا داستانی.
شأنوه “انکرالصوات” اولوبدور نازل،
گئدیب، ای خر، آچیباری بیرجه اوخو قرآنی.
حق قیلیب آیۀ انعامی سنینچون نازل،
حیف انسان دئیه‌لر سن کیمی بیر حیوانی!
قویموسان آدوی سیّد، نه صلات و نه سیام،
یوخدو سن فسقده بیرارمنی و نصرانی.
گئجه‌لر مست، گونوزلر دخی نجاست و جونوب،
اویموسان بت لره، ترک ائیله میسن ایمانی.
هاردا بیر بت گؤره سن سجده قیلیرسان او بوته،
خاچ اولور گردنوه زلف عبیر افشانی.
سنه سیّد دئسم، آغزیمدا دلیم لال اولسون!
ائتمیسن ترک بو گون مذهب ایله ارکانی.
دئدیم: ای سرو بوتان، سورمه بو گونه تؤوسو،
ساکت اول، هر نه دئدین، وئر منه بو میدانی!
تا سنه شرح قیلیم صورت احوالیمی من،
گوش قیل هوش ایله عرض من سرگردانی.
حق تجّلاسیم هر یئرده گؤره اهل نظرین،
عیش ائدر ذوق ایله، بیر حال دیر اول وجدانی.
یوخدور اهل نظره کعبه و بتخانه ده فرق،
هر مکاندا تاپیلیر شعشعۀ صبحانی.
بوت اؤزو حال ایله تسبیح قیلیر صبحانه،
گئت، اوخو “صبحه لله”دا بو معنانی.
کیمی سی کعبه ده حقی، کیمی دئیر ایچره گؤرور.
هره بیر نوع گزیر، آختاریر اول جانانی.
گؤردو حق پرتونو دوختر ترساده عیان،
نه مذمت ائله ییم عشقده من سنانی.
داغه فرهاد چالیب تیشه نی شیرین شیرین،
گؤردو شیرینده حق نورینی، وئردی جانی.
گؤردو مجنون اثر خالقینی لیلاده،
دوشدو وادی لره، منزل ائله‌دی صحرانی.
گؤردوم عکس روخوو آیینۀ جامده من،
واجب ائتدیم اؤزومه شرب مئی صهبانی.
بو صفتده، گؤزلیم، شهرده بیر من دئییلم،
چوخدو من تک بو یئرین عاشیق سرگردانی.
بیلیرم کی، نه سبب دندی منه طعنه لرین،
اینجیدیرسن نه سبب دندی بو باغریقانی.
منده اولسایدی اگر سیم و زر و دولت و مال،
گؤزوه اوندا گلردیم، گؤزلیم، روحانی
چیخماز ایدین گئجه گوندوز اوتاغیمدان تیشرا،
ایلشیردین او زامان صالحه تک پنهانی.
بس علاج اولدو کی، تحصیل قیلام سیم ایله زر،
درد پنهانیما حاصل ائله ییم درمانی.
مشدی عبدل علی حالیما واقف اولسا،
ائدر البته بو سرگشته اوچون سامانی.
بس گرک شکوه ائدیم زادۀ عبدل للهه،
عید نوروزده شاد ائیله یه بو گریانی.
بیلیرم یوخدو ساوادی، اونا خوش گلمز شعر،
اولا بیر نظم خصوصاً کی، بئله طولانی.
بیله جک کی، بو قدر شاعره پول لازیم دیر،
ائده جک چارۀ دردیم او سخاوت کانی.
وار امیدیم کی، ائده سیّد زاری خرم،
ائیله یه لطف ایله اؤز بنده سینه احسانی.
ای خدا، مشهدی عبدل علی نی شاد ائیله،
اولا منصور و مظفر اؤزو و اعوانی!