حسن بئی نبی بئی اووا

حسن بئی نبی بئی اووا

ای حسن بئی، حسن الخلق، رفیع الاخلاق،
شخص اول کی، سنه یوخدو جاهاندا ثانی.
در احسانوه محتاج عموماً فقرا،
سنسن عالمده اولان لطف و سخاوت کانی.
اهل شیروانی بو ایل لطف ایله احیا ائله دوز،
حق قبول ائیله یه عالمده بئله احسانی.
فقرالر هامی صدق ایله دعاگودو سنه،
حق سنین زحمتوو ائتمه یه، یا رب، فانی!
هم بدن زحمتی وار، هم دخی پول دان کئچمک،
حج اکبردی بو، ای ملک سخا سلطانی.
توتدوغون ایشده سنین ذره جه نقصانین یوخ،
کیم پسند ائیله‌مه سه، عقلده وار نقصانی.
لیک سندن گیلئییم وار، اویا کان سخا،
گور قبول ائیله یه سن، عرض قیلیم من آنی.
بیر تاغار بوغدا کریم بئی دخی ائیلردی برات،
از قضا اولمادی بو ایل ایشیمین سامانی.
بیر تاغار بوغدا هر ایل حاجی علی اکبر بئی
منه ائیلردی عطا، کسدی حق اول احسانی.
گاه تفلیسه یوگوردوم، گهی چاپدیم باکییا،
قویدو آواره بو گردیم من سرگاردانی.
جمع ائدیب مور و ملخ جمله ایل آذوقه سینی،
هره اؤز دردینه بیر نوع تاپیب درمانی.
بیر تاغار، ایکی تاغار خلق ییغیب آذوقه،
کیمی آنبارینی دولدوردو، کیمی انبانی.
منی بازاره ائدیب گردش گردون محتاج،
اولدو سرمنزلیم علاف لرین دکانی.
ساری بوغدا اونو آلدیمسادا، آرپا چیخدی،
ائیله‌دیم گونده بیر علاف ایله من دوانی.
از قضا دورد و دییرمان، کسیلدی چؤرییم،
ائومیزین اولدو دخی جَفته اونوندان نانی.
اما نه جَفته اونو، طعمی آجی، زهر کیمی،
قیسم سِیُّم کی، یئمزدی اونو چؤل حیوانی.
سانکی ازوای ایدی هر بیر تیکه سی اول چؤریین،
سالدی اسهاله اوشاقلاری چیخیب…….
ائویمیز بیر، ایکی، اوچ هفته چؤرک سیز قالدی،
گاه بیشیردیک نوخودو، گاه یئدیک لوبیانی.
قانینی شیشه یه توتدو فلک اول طفل لرین
آج قالیب قاچدی اوشاقلار دوداغی نین قانی.
گئجه‌لر نقل دئدیم کؤرپه اوشاقلاریم اوچون،
نسیه سؤزدن نه بیتر، چئینه‌دی لر یورغانی.
گؤردوم آخوندلارا بخشاییش اولوب جَفته اونو،
افطاروی سورت کی، واردیر یئمه یه امکانی.
اؤزومو عالیم و سیّد بیلیبن فخر ائتدیم،
فکر قیلدیم کی، منه آرتیق اولور احسانی.
دئمه بونلار منی شمر اوغلو بیلیرمیش، هئیهات!
نه مناسب کی، سرافراز ائده‌لر مروانی.
بو چیلئن لر کی، بیزیم واردیر، انشالله،
تئز چیخار اوچ ماناتا بوغدا اونون باتمانی.
بیری سی وار کی، تمنا ائدیر آغ ساقّاللیق،
من اونون ریش سفیدینه اولوم شیطانی!
مهدیۀ عصر بو گون لرده ظهور ائتسه اگر،
مینمز اؤز ائششیینی، اونا قویار پالانی.
حاجی محسن بئیه لازیمدی کی، احسان ائله سین،
چون اؤز اسمینده مشخصدی بو رمز ثانی.
علی بئی دن نه دئییم، چوخدو شکایت اوندان،
هیچ اول گؤزله مه ییر نسل شه مردانی.
حاجی مهدی بئیه تاری اؤزو وئرسین انصاف،
بیرجه سالمیر یادینا سیّد سرگردانی.
صفر اوغلو حاجی مهدی باکییا ائتدی سفر،
سالدی دریاچه یه زورق بوراخیب یئلکانی.
باکییا گئتمیش ایدی تا اونو تحویل آلسین،
یوللاسین تئز کی، اوجوزلوق ائیله سین شیروانی.
کئیفه خرج ائیله دیگین قویدو اون اوسته حاجی،
مرحبالر کی بونا، کامل ایمیش ایمانی!
حیف اول حاجی اویس دن کی، قوشولموش بولارا!
چونکی بونلاردا تاپیلماز روش عرفانی.
ائیله‌دی حاجی اویس قره نین روحونو شاد،
گلدی فعلیندن اونون رایحۀ رحمانی.
بونلارین وصفی هله سونرایا قالسین سیّد،
هله سن دوردوی یاز، طبعوه وئر جولانی.
صاحبا، شوکر کی، اون ایکی ماناتیم وار ایدی،
گؤتوروب خدمتوه شوق ایله گلدیم، آنی.
در آنبار گشاد ایدی سخاوت، ای بئی،
توربالاردا گوروب اون شؤوقه گتیردیم جانی.
بیر مِشوک اوون طلب ائتدیم کی، عطا ائیله یه سیز،
قورتارام تا غم الیندن بو دل ویرانی.
گه منه یارما حواله ائله دین، گاه کؤپک
کی، یئمزدی اونو آج قالسا یوز ایل، مولتانی.
اوستومو اوننو گؤروب، سانما دییرمانچی منی،
آچ بصیرت گؤزوو، لعلی خضف دن تانی!
گرچی ظاهرده فقیرمسه، غنی دیر طبعیم،
بو گدالیقدا پسند ائیله منم سلطانی!
“فقر فخریمدو” او گوندن کی، دئییب پئیغمبر
بیلمه نم بیر ذره جه دنیانی و مافی هانی.
من کی عنقا کیمی بیر قاف قناعتدی یئریم،
نئیلیرم جیفۀ رمز اوه بئله دنیانی؟
کیشی نامرد اتیین توتماییب، اؤلمک خوش دور،
چونکی نامردده یوخ بذل و عطا امکانی.
من سنی مرد بیلیب خدمتوه گلمیش ایدیم،
فرض قیلدیم کی، حسن بئی ده اولور بئی قانی.
من بئله فرض قیلیردیم کی، یامان گونده منه
ال توتارسان، دخی بو جسمه وئرسن جانی.
من بئله فرض قیلیردیم کی، ایشیم دوشسه سنه،
ترک ائدیب اؤز ایشیووی، سن بیتیرسن آنی.
حیف، اول ظن کی، من ائیله‌میشم، باطل ایمیش!
چکدیم اول حرف لره ایندی خط بطلانی.
گرک اوندا منه سن چاره قیلایدین، ای بئی،
گؤر اونون اون ماناتا اولسا ایدی باتمانی.
اللی ایلده بئله ایل دهرده بیر دفعه دوشور.
چرخ دایم ائله مز ذلت اوچون دورانی.
قیش گئدر، یاز گلر، لاله وگول لر آچیلار،
باغ لر ظاهر ائدر سرو گول و ریحانی.
گون همیشه بولود آلتیندا نشیمن قیلماز،
ابردن تا کی چیخیب دهری قیلار نورانی.
دایما گوشۀ زندانده قالماز یوسف،
عاقبت تخته چیخیب ترک قیلار زندانی.
بو یامان گون دور، عزیزیم، بونون -
عمرو آز اولار، بو دئییل نوح نجی عمر ائله سین طولانی.
سنی تاری، اؤزون انصاف ائله، بیر من کیمی شخص
کی، فصاحتده اونا خلق دئییر خاقانی،
سن تکی بوی اونا بد گونده علاج ائیله‌مه یه
دخی چیخمازمی گؤیه آه دل سوزانی؟
گر منیم شکوه می کونسول ائشیده، یا کی بیله،
سنه البته مذمت یازاجاق طولانی.
سیّدا، بسدی شکایت، سؤزو اتمامه یئتیر،
بوندان آرتیق دخی اینجیتمه بئی ذی شاَنی.
حق تعالی ائله سین عمرونو دایم افزون،
کسمه سین لطفونو اوندان کرم ربانی.
ائله سین تاری اونا بیر ولد صالح عطا،
حالینا شامل اولا مرحمت صبحانی.
مومیا ایستمه منتله جاهان اهلیندن،
صبر قیل محنتوه، ساخلا شکست اذانی.