منو
حسن بئی، نبی بئی اووا
حسن بئی، نبی بئی اووا
عید نوروز مبارک اولا، ای یار، سنه!
یار اولا مرحمت قادر و قهار سنه!
ائدر آماده گول عالی نثار ائتمک اوچون،
گولروخوم، عاشیق اولوب گولشن و گولزار سنه.
باغبان گؤرسه سنی باغده، اؤز گول لرینی
ائده جک جمله نثار، ای گول بی خار، سنه.
باغباندان ائشیدیب نرگس مستین وصفین،
گؤز آچیب، عاشیق اولوب نرگس بیمار، سنه.
طبلۀ عود نه عطار سپیر عطر گولاب،
ایسته ییر کیم، اؤزونو اوخشادا عطار سنه.
عید نوروزدور، ایچ بادۀ گولفام، ای گول،
تا وئره اؤزگه صفا بادۀ گولنار سنه.
ساقیا، وئر مئی گولگون کی، غمیم اولدو زیاد،
تا کی اظهار ائله ییم بیر نئچه اسرار سنه.
دهن یاری توتوب دون گئجه من، ای ساقی،
دئدیم: ای موغبچه، بیر مخفی سؤزوم وار سنه.
دئدی: سؤز مخفی اولاندا اولور اول سؤزده غرض،
بیلیرم، صحبت مخفیده غرض وار سنه.
هیچ شک یوخدو کی، شیطانه اولور یار ملک،
بو گئجه خلوت آرا اولسام اگر یار سنه.
تولویورسان منی شیطان کیمی یوز حیله ایله،
لایقی وار کی، دئسم مرشد اشرار سنه.
قویموسان آدوی سیّد عبث، ای ناسیّد،
دئمرم نسل شه حیدر کرار سنه.
مُشرَبین باده دی، همدم سنه دایم ساده،
لعنت حق دیر البته سزاوار سنه.
توپرور عرصۀ محشرده محمد اوزووه،
دئمز اولاد او گون احمد مختار سنه.
الووه دوشسه کسرسن سون امامین باشینی،
تاپشیریب منسبینی شمر ستمکار سنه.
نه سیام و نه صلات و نه قیام و نه قود،
نه سوجود و نه رکوع و نه بیر اذکار سنه.
آتمیسان مذهبی، ترک ائیله میسن ایمانی،
لایقی یوخدو کی، قسمت اولا زنّار سنه.
یاراشیر لوتی چرنگی کیمی دونبک چالاسان،
گؤتووی بورجداسان، ال چالا حضار سنه.
صنعتین یوخدو سنین شعر دئمک دن اؤزگه،
مایۀ فخر اولوب شیوۀ اشعار سنه.
اهل شیروان سنی ادبار بیلیرلر، اما
اولمویور هیچ بو احوالده بیر عار سنه.
سنی گؤز یاشی کیمی سالدی حسن بئی گؤزدن،
سود وئرمز دخی بو دیدۀ خونبار سنه.
توتما تاجرلره امید، بئز اؤلچندو بولار،
قییماز البته بیر آرشین بئزی تجار سنه.
احتیاجه بیری نین یانینا گئتسن دئیه جک،
مرد تمنا و دنی، فاسق و فوجّار سنه.
دولتی چوخدو بیزیم شهرده محمود آغانین،
اؤله سن، بیر قپیگین وئرمز او سرکار سنه.
آغ… اولسا، گلیر نئچه قارا پول الوه،
او زامان ائیلر آغا حرمت بسیار سنه،
کیم چاتیب خیره بو شیرواندا آلئکسان بئی دن؟
خیری قوی، شوکر ائله کیم، ائتمه سین آزار سنه.
چوخ آغیردیر ایشی حاجی علی عباس بئی یین،
قحط اولوب دهرده بیر مرد سبکبار سنه.
سنه یوخ موللا مجیدین کرم و احسانی،
ائیله ییر قورو قورو مجدینی اظهار سنه.
ال توتان بیرجه شماخیده علی بئی دی گئنه،
چونکی هردم بیر اونون مرحمتی وار سنه.
بیرده مولادی سنه حاجی آغا سیّد علی،
اودو بازار محبتده خریدار سنه.
بو ایکی تاجری خارج ائله یندن سونرا
سؤیله ییر ابل شماخی هامی مردار سنه!
شهر شیرواندان او گوندن کی، حسن بئی گئتدی،
بخش ائدن یوخدو دخی درهم و دینار سنه.
بیر چوخا ائیله‌مه‌دی کیمسه سنه بذل و عطا،
… عریاندو، وئرن اولمادی شلوار سنه.
بیلمه‌دی بیر پارا نادان حسن بئی قدرین،
یارووی ائیله‌دی لر عاقبت اغیار سنه.
شهر شیروانی ائدیب ترک، اوتوردو باکیدا،
علی چاتمیر دخی اکرام ائده هر یار سنه.
کئچیر اوقاتی اونون مَهر علی بئی له دخی،
بیرده مشکل دور اولا همنفس جار سنه.
بالا اوینا، چالا گر دونبیین آمبارسون بئی،
نیه لازیمدی دئسین نار بدن نار سنه.
جئنئرال کونسول ایله همدم اولان کیمسه، دخی
همدم اولماز بیری، ای زار دل افکار، سنه!
زاییر مشهد مولادو محمد صادق،
وئره جک، عبد ائله‌ییب، قیر عوضی قار سنه.
سیّدا، پرده نی چوخ آچما، ایشی فاش ائله مه،
طعن ائدر، مست بیلور عارف و هوشیار، سنه!
هامی دان عارف و هوشیار حسن آغا دیر،
ائدیر آغاسی کیمی مرحمت اظهار سنه.
تقی اوف آجلیق ایلینده سنه انعام ائله‌ییب،
قیل دعاسین کی، اونون مرحمتی وار سنه.
کئچن ایل چای ایله قند ائتدی عطا مَهرعلی بئی،
یئنه گفتان اولور، قورخما، شکربار سنه.
گرچی چارشنبه‌لرین چای و یئمیش سیز کئچدی،
بسدیر اول ماه فلک شمع شب تار سنه.
بایرام آخشامی آلیب نسیه یئمیش عشرتله،
برجوو گؤندریر اول ماه کرم وار سنه.
قورخما، عالمده حسن بئی سنه امداد ائیلر،
راضی اولماز کی، یئته خفت بسیار سنه.
ای حسن بئی، حسن الخلق، نجیب الاحوال،
بیر اوغول ائتسین عطا حضرت ستار سنه!
گؤرمه‌دیم بیر کیشی شیرواندا سندن غیری،
او سبب دن بیلیرم مدحی سزاوار سنه.
تورکی یازدیم سنه اشان کی، حالی اولاسان،
ائله‌دیم دردیمی فی الجمله من اظهار سنه.
بوندان آرتیق دئسم احوالیمی تاب ائیله‌مه سن،
ای کرم کانی، روا گؤرمه‌دیم آزار سنه.
عارف و کامله آچماق سؤزو لازیم گلمز،
ائیله‌ییب ذهن عطا حضرت داوار سنه.
مطلبیم عید اوچون اولموشدو مبارکبادی،
سبب اولدور یازیرام بیر نئچه اشعار سنه.
بار ایلاها، بو صفت چوخ گؤره سن بایرامی،
هاردا اولسان بو زمانه اولا گولزار سنه!
یار و اعوانین ایله عیش و صفا ائیله یه سن،
وئره ساقی قدح بادۀ گولنار سنه!
نئجه کی، اؤیله دو ایهامیمی درک ائتسن اگر
رب عزت ائله سین دشمنوو خار سنه!