قولو بئی یه

قولو بئی یه

آلیشانا، ای قولو بی، گوهر بحر سخا،
وصف ذاتین ائله مک عین صفاتیم دیر منیم.
من گدای درگئهین، سن پادشاه شوکتیم،
تابع اولماق عمروه راه نجاتیم دیر منیم.
من طبیبون نفس، هم شیرین تکلم شاعرم
کیم، ملک لر ذکر شعر طیباتیم دیر منیم.
عالم ظلمت سرا ایچره هامان خیضرام کی، من
آب حیوان رشهۀ کیل کو دواتیم دیر منیم.
آب حیوان دیر کلامیم خلقی احیا ائیله ین،
ای سکندرفر، هامان آب حیاتیم دیر منیم.
بیدق فیل افکن عصرم کی، هر یان رخ توتام،
یوز وزیر و شاه و توسن طبع ماتیم دیر منیم.
شیعۀ خوللخ ضمیرم، میر و سلطانیم
علی کیم، او شه حلال عُقد مشگلاتمیدیر منیم.
چوخ چاغیردیم، یئتمه‌دی مولا علی فریادیما،
بیلمیشم کی، باعثی اؤز سیییباتیم دیر منیم.
ایندی سندن قالمیشام مشکلده، امداد ایسترم،
تشنه کامم، شفقتین آب فراتیم دیر منیم.
مختصر، وار بیر آتیم کیرتی، زولجناه عصردیر،
فی الحقیقه هم قولوم دور، هم قانادیم دیر منیم.
اول بوراقیم، رفرفیم دیر، عز و جاهیم، دولتیم،
هم صلاتیم، شوکتیم، خمسوم، زکاتیم دیر منیم.
بیر نئچه گون دور قالیب حیوان سامان سیز، آرپا سیز،
حیف اول بدبخت و کم طالع کی، آتیم دیر منیم.
اؤلدو آت، ای دوست، قیل آرپا سامان انجامینی،
سانما کیم، آرپا سامان قند و نباتیم دیر منیم.
نقد فی المجلس اگر سن هم سرانجام ائتمه سن،
داد الیندن ائیلرم تا کیم، حیاتیم دیر منیم.