منو
علی بئی یه
علی بئی یه
گلدی نوروز کی، گولشن لره زینت وئرسین،
عطر آزاری گوله تاب و طراوت وئرسین.
دهر آرا طبع هوا مانی نقّاش کیمی
قلم حکمت ایله گول لره صورت وئرسین.
دویدوروب ژاله ایله لاله و مرجان قدحین،
هجر بیماری اولان بولبوله شربت وئرسین.
باد گیسوی عروسانه یئتیرسین شانه،
گول اوزون غازه قیلیب، سروه رونت وئرسین.
نوعروسان چمن زینت اولونسون یکسر،
گول اله ساغر آلیب بادۀ عشرت وئرسین.
صحن گولزارده آچسین ورق حکمتی گول،
بولبول خسته دله درس فصاحت وئرسین.
شرح اولونسون روش ماضی و مستقبل و حال،
گول بو تدریس ایله بولبول لره حالت وئرسین.
نرگیس آچسین گؤزونو باغه تماشا قیلسین،
سوسن آچسین گؤزونو ناز و نزاکت وئرسین.
مسند ائتسین همه لی خسرو زرین نصب،
باغ شاهدلرینه خلعت و نعمت وئرسین.
کامران وصل گول تردن اولوردو، ای دل،
خار سرتیز اگر بولبوله فرصت وئرسین.
بولبول ائیلر گول و اوصاف گولوستان ایچره،
تا آچیلسین گول، او بی عاره مسرت وئرسین.
آچیلان دمده گول و غارت ائدر گولچین لر،
صبر بولبول لره اول صاحب قدرت وئرسین.
سیّدا، سن گول و وصف ائیله‌مه، گول دن نه بیتر؟
قولو بئی مدحینی قیل، تا سنه خلعت وئرسین.
سنه نوروزده هر ایل ائله‌ییب انعام عطا،
یئنه مدح ایله، بو ایل کؤنلوه بهجت وئرسین.
علی بئی وصفینی قیل، وجهی النّقد اولسون،
نسیه سؤزدن نه بیتر، نقد ایله نعمت وئرسین.
قولو بئی نقد شناس شعرا دیر،
سیّد، وار امیدیم کی، سنین شعروه قیمت وئرسین.
هر نه کامین اولا بیر رنگ ایله ائیلر حاصل،
راضی اولماز کی، سنه رنگ خجالت وئرسین.
هر نه ائتسه سنه ظاهر قولو بئی ائتسین عطا،
حق اونون دشمنی نین مرگینی خلوت وئرسین.
گون به گون حق ائله سین دولتین افزون بولارین،
حاسد و هافدینین کؤنلونه نفرت وئرسین.
ائیله سین اختر بختینی سعادتله قرین،
عزت و حرمتینه گون کیمی شهرت وئرسین.
کرم لطف لری صفحۀ شیروانی توتوب،
بوندان افزون اولارا تانری کرامت وئرسین.
صاحبا، وصف دئییل دیر بو کی، من ائیله‌میشم،
وصف چیرما نچیدیر کی، گونه زینت وئرسین،
گونو بیر کیمسنه وصف ائیله‌مه‌ییب عالمده،
وصف اودور کی، اؤزو حالینا شهادت وئرسین.
سیزه نعمت لرینی حق ائله‌ییب جمله عطا،
بیر اوزون عمر سیزه عمرده راحت وئرسین.
غرضیم وصف دئییل، خیر و دعا دیر مطلب،
تاری بو ایشده منیم طبعیمه سرعت وئرسین.
شهر شیرواندا منیم عزتیمین باعثی سیز،
حق تعالی سیزه بو دهرده عزت وئرسین.
ائیله سین شاد خدا روحین او مرحوم لرین،
ساقی حق اولارا کوثر جنّت وئرسین.
صاحبا، فصل باهار اولدو، کؤنول شاد گرک،
باری قرا قویما منیم قلبیمه سیقلت وئرسین.
نئچه ایلدیر اولورام تحت پناهیندا سنین.
قویما هر کلب اقوری منه زحمت وئرسین.
اینجسم من، اولو رنجیده دل پاک رسول،
قویما پیغمبره بو قوم اذیت وئرسین.
سن گرک ساخلایاسان خانۀ عزتده منی،
شاه لطفون نیه هر بیدقه جرعت وئرسین.
ای منیم تاج سریم، سرور عالی نصبیم،
کیم نجیب اولسا، گرک بوی نجابت وئرسین.
سیّدا، شعرده رمز ایله حکایه آچما،
نه گرک، وصفووی دئ، بئی سنه خلعت وئرسین.