عرب افندی زاده محمود افندی یه

عرب افندی زاده محمود افندی یه

وار عرض سلامیم سنه، بیچاره افندی،
ای اصل وطندن دوشن آواره، افندی،
اقبالی دؤنن دهرده ادباره، افندی،
وی تیر جفادن جگری یاره افندی،
بیچاره کیشی، بی کس و بیکاره افندی!

آگاه و خبردار اول، ایا عارف و کامل،
بیر سیز تکی عالیم نه روا دیر اولا جاهل،
بیر پارا خبرسیزدن اولوبدور بیزه واصل،
بیر مطلب او اطواردن اولماز سنه حاصل،
تغییر مناسبدو بو اطواره، افندی!

اول گون کی، سنی خلق ائله‌دی خالق اکبر،
هم روزی روزی شبووی قیلدی مقرر،
هر یئرده کی، اولسان چاتاجاق رزق مقدر،
بیر پاره چؤرک دن اؤتری فکر ائله آخر،
دؤنمک نه روا روبه مکاره، افندی!

غیبت نه روا دیر، کیشی، ترک ائت بو صفاتی،
یاخشییدی آغا بئی سنه وئردیکده براتی،
هر ایل دوگونو، بوغدانی، آرپانی، هم آتی،
یاخشییدی کسنده چوخانی، کورک هراتی،
ایندی یامان اولدو، آ یوزی قاره افندی؟

بی حال گلیب “سدره یه”، حال ایله گئتدین،
یعنی کی، دوشاب ایله، بال ایله گئتدین،
هم آت و اؤکوز، بیر نئچه باش مال ایله گئتدین،
شاهانه قبا و کمر و شال ایله گئتدین،
دؤندرمیش ایدین وصفوی تجاره، افندی.

قورخما آغا بئی دن، او دئییل دیر ائله اولاد –
کیم، سن تکی بیچاره لره ائیله یه بیداد،
سن کیمی دئییل طبعی اونون پیس لییه معتاد،
صدق ایله چاغیرسان یئنه ائیلر سنه امداد،
هر یئرده فلک سالسا سنی داره، افندی.