شاماخی نین تزه بئی لرینی هجو

شاماخی نین تزه بئی لرینی هجو

نطقه گل بولبول طبعیم کی، عجب حالت دیر،
قیل تکلم کی، چکیم نظمه دُر غلطانی.
تازه ایشلر گؤرونور ساحت شیروان ایچره،
اؤزگه آیین و روشده گؤرورم دورانی.
خلقی بی دین ائله‌ییب گؤر نئجه بئی لیک هوسی،
ترک ائدیب آخرتی، جمله توتوب دنیانی.
جمله بی غیرت و بی همت اولوب خلق جاهان.
جمله سی جیفه اوچون باده وئریب ایمانی.
جمع اولور اون ایکی آدم کی، فلانی بئی دیر،
آند ایچیرلر قویوبان اورتالیغا قرآنی.
بیری بئی اولماق اوچون اون ایکیسی کافر اولور،
توتار آخر اولان هم غضب ربانی.
بونلارین باشچی سی معلوم چوپر احمد بئی دیر،
نسل انساندا عجب دیر گؤرورم شیطانی.
اله دوشمز بئله مردود ازازل صورت،
ظاهر ائیلر بو کؤپک عالم آرا مروانی.
او قدر وار طمعی، موللادان آرتیق حقا،
آند ایچر اوجونا باسّان بیر اودوش حلوانی.
آتاسی صادق، اؤزو بس نه اوچون کاذب دیر،
بیلیر آناسی کی، هارداندی اونون نقصانی.
بیری سی کبله حسین بئی نظر اوغلو خودکش،
اونا حاجی کمال اوغلو اولا بیلمز ثانی.
دوغرودور، حاج کمال اوغلوندا دا وار بیر بئله ایش،
ولی مشهور دئییل عالم آرا داستانی.
چونکی تعلیمینی بو قارداشی صادق دن آلیب،
هر نه ایش توتسا، اوتاغیندا توتار پنهانی.
بیری سی اول حاجی احمددی کی، وار صاحب ریش،
یاخشی ائششکدی، ولی یوخدو اونون پالانی.
هر زامان ایسته سه‌لر شاهد اونون بئی لیگینه،
گتیر اورتالیغا کوروک ایله سیندانی.
یعنی رحمتلیک آتام دا منیم آهنگر ایدی،
کسیب ائششک نالی چوخ مصطفی خان دورانی.
هر اوزون ساقّال اگر لازیمه دیر بئی اولسون،
بس نئچون بئی ائله میر محمود آغا کوزمانی؟
بار ایلاها، بو کوارتالنینی چوخ گؤرمه بیزه،
اهل دردین او کرم پیشه‌دی چوخ درمانی.
هامی دان یاخشی بودور حاجی ماناف دا بوی اولوب،
گؤر من ایندی ائدرم گورباگور اول عریانی.
ادعاسی بودو خانزادۀ اصل و نصبم –
کی، ترقّی ائله‌ییب هیچ بَیَنمز خانی.
بیری قارداشی ممیش، ال چکیب اوندان شیطان،
بیلیگین شوقی ایله چیخدی اونون هم جانی.
وار ایمیش بئی لیگینه الده شهادتنامه
کی، وئریب دیر منه شه خالصه اول زنگانی.
بیری سی حاجی کاظم دیر، اؤزو چوبان اوغلو،
تانیماز دوزمو او دؤرد مین قویونون چوبانی؟
واردی بیر والده سی، آدی اونون کوثر ایدی.
اهل قلعه بازار اوچون بیشیردی نانی.
بیری سی حاجی تراب اوغلو قوروتدی ممد،
او، نئچون بئی دو، گؤرک، کیم بئی ائدیب دیر آنی؟
هانسی دعواده گؤرک تیغ چکیب، باش کسدی؟
هانسی رزم ایچره آلیب دیر الینه قالخانی؟
آی اوشاقلار، منه اظهار ائله یین، یوخسا بودور،
فتح ائدن آغ قوشانی، دارغونی، داغیستانی؟
بیر یتم طفل ایدی، گؤتی آچیق، باشی کچل،
کوچه لرده دولانیردی، یوخ ایدی تومانی.
ننه سی ساخلار ایدی بیر سورو تبریز تویوغو،
دؤشیی ییرتیق حصیر…. گووَج قازقانی.
حاج صمد اوغلو قدیر هم دؤشه دیر کوچه لری،
علی غریب دیر، او دا بوینوندان آثار خالتانی.
آتاسی چون ائشیدیب اوغلونون بئی اولدوغونو،
قبر ایچینده فرحیندن پیلییر زورنانی.
بیری لاهیج حاجی قاسمدی کی، داغلار آیی سی،
بیلمیرم بئی لیگی نئیلیر بو چؤلون حیوانی؟!
اینجه‌ییب دیر، بئله معلوم، دوز اکمک لیک دن،
گیردمانه بوراخیم من بو کؤپک توپلانی.
ایکی دیبدات*، معین کی، اولار دا بئی اولوب،
اولارین وصفی گرک دیر اولونا طولانی.
بیری نوادۀ دللک صفر، آدی سلطان،
بلی، الحق اودو اصل نسبین سلطانی.
پول یئمک دن اؤتری تا کی اولوبدور دیبدات،
چئویریر، آخشاماجان فکر قیلیر، چورتکانی.
ائدیب اولگوج بولؤون باباسی نین دستاویز
کی، منم فخر جاهان، من تکی بئی زاده هانی؟
عجب اولاد قویوب گئتدی، او دلاک صفر،
پوخ قویوسونا سالیم من بئله باش قیرخانی!
بیری عباس، اؤزو خنّاس، دئییر من ده بیم،
بیلمیرم کیم بوی ائدیب دیر بو چولاق قارغانی؟
ایسته ییر بیر قیچ ایلن گؤر بو دا بئی لیک ائله سین،
کول سنین باشوا شیروان، عجب اولدون فانی!
من ائشیتدیم کی، عباسین باباسی چرچی ایمیش،
گتیریرمیش بازارا ساتماق اوچون چولپانی؛
آغسو شهرینده جوهود کیمی قاباغیندا ائشک،
دولدوروب سوزن و قیطان ایله اول توربانی.
مین مانات دان یوخاری خرج ائله‌دی هم آغا بئی،
دئدی یا چین گلی، یا خاچ، یا امیم احسانی.
بئی لییه شوق ائله ییر هم آشور اوغلو آغا بی،
هئچ اوتانمیر کی، آتاسی چاغیریر “تهرانی”**
گئتدی حجه آتاسی تا اولوما حاجی خطاب،
کیم اونا حاجی دئسه، بیل کی، دئییر بهتانی.
بیزده بیر نئچه نفر عزمیمیزی جزم ائتدیک،
ثبت ائدک مهروموزو، بئی ائله یک خانجانی.
بیرده اول عالی نصب، جمله جاهان ایچره نجیب،
سبزه میدانی مشو اوغلونو آغ قربانی.
بئی اولان کیمسنه نین خالصه و کندی گرک،
بئی ندیر کسدیره کاروانسارالار دالانی؟
ایکی کس وار کی، بلی، اونلارا بئی لیک یاراشار،
صاحبی جود و سخا، رحم و مروت کانی.
وار بو بئی لر کیمی چوخ عالی نصب لر، اولارین،
صدق و اخلاص ایله درگه‌لری نین دربانی.
بیریدیر حاجی آغا بئی، بیری آغا رضا بئی،
اونلارین یاوری اولسون کرم ربانی.
سیّدا، سن بو ایکی سرون عالی نصبین،
مدح و اوصاف لرین گون کیمی قیل نورانی.
—————————————————
* دئپوتات
** یعنی: آغ توت ساتیر.