منو
محمد صفانین تعریفی
محمد صفانین تعریفی
ای غمین بو دل محضونه صفا،
کعبۀ کویوه عشق اهلی فدا،
هر قدرائیله یه سن جور و جفا،
من سنه ائیله مزم غیر وفا،
هر نه حکم ائیله دین، ای ماه لقا،
جمله سی اولدو مرادینجا روا.
گؤزلیم، شیمدی ندیر فرمانین؟
جانی قربان سنه بو نالانین!
سروریم، پادشهیم، سلطانیم،
گولروخوم، سروقدیم، ریحانیم.
ای فرح بخش دل سوزانیم،
بیلمدیم نولدو منیم نقصانیم،
دؤندو، ای ماه، بئله دورانیم،
“یان” دئدین هجرایله، یاندی جانیم،
گؤزلیم، شیمدی ندیر فرمانین؟
جانی قربان سنه بو نالانین!
سؤیلدین عشق ایله زار اول، اولدوم،
هجرایله سینه فکار اول، اولدوم،
نظر خلقده خوار اول، اولدوم،
غم و اندوهه دوچار اول، اولدوم،
زار و بی صبر و قرار اول، اولدوم،
دئدین: “اغیارایله یار اول”، اولدوم،
گؤزلیم، شیمدی ندیر فرمانین؟
جانی قربان سنه بو نالانین!
تا گؤزوم هجرایله گریان اولدو،
خاطرین گول کیمی خندان اولدو،
دؤندو وصلین منه هجران اولدو،
ایستدین دل اولا ویران، اولدو،
گنج عشقین اولا پنهان، اولدو،
دئدین “اولسون جیرین قان”، اولدو.
گؤزلیم، شیمدی ندیر فرمانین؟
جانی قربان سنه بو نالانین!
ائیله دین دؤور خلاف معمول،
آفتاب عملیم ائتدی اوفول،
بند اولوب زلفووه اولدوم مغلول،
دئییلم گرچی بو سوداده ملول،
“کُنتُ فی العشقِ ضُلماً و جَهُل*،
ائله‌دیم حکمووی جان ایله قبول
.گؤزلیم، شیمدی ندیر فرمانین؟
جانی قربان سنا بو نالانین!
گونده بیر شَعبَه ده آغاز ائتدین،
چوخ اولان لطف و بیزه آز ائتدین،
اوز وئریب، غیری سرفراز ائتدین،
بیزی قویدون، اونو ممتاز ائتدین،
حکم و فرمانوی ابراز ائتدین،
منی هر ناکه سه دمساز ائتدین،
گؤزلیم، شیمدی ندیر فرمانین؟
جانی قربان سنه بو نالانین!
ای سر زلفوه قربان سیّد،
اولدو دیوانۀ دوران سیّد،
اولوب احوالی پریشان سیّد،
کی قالیب بی سر و سامان سیّد،
آغلاییر هجرین ایله قان سیّد،
اولدو تورپاق ایله یکسان سیّد.
گؤزلیم، شیمدی ندیر فرمانین؟
جانی قربان سنه بو نالانین!
—————————————-
* من عشقده مظلوم و جاهل اولدوم