منو
غزئت ندیر
غزئت ندیر
دون سئوال ائتدی بیر نفر جاهل –
کی، غزئتدن ندیر بیزه حاصل؟
بو حسن بئی نه ایستییر بیزدن،
دولدوروب عالمی قورو سؤزدن
دانیشیر گاه اکین، زراعتدن
گاه ماشین، گاه اؤزگه صنعتدن.
شرح ائدیر، گاه سود قاییرماغی –
کی، قاتیقدان بئله چکین یاغی.
پئن دیری اؤیره دیر کی، بؤیله توتون،
ساخلاییب آرتی جاق باهایا ساتین
گاه آمریکادان ائیله یر کیم یاد
بو صفت بیر ماشین اولوب ایجاد.
نیه لازیمدی بیزلره ماشین،
نه اوچون خلقین آلدا دیر باشین؟
بابامیز گؤرممیشدی ماشین ایشی
انگلیس کیمی تولاییر بو کیشی.
داد ائدیر کی، گرک دیر علم اوخوماق،
چکمه تیکمک و یا کی چیت توخوماق
بیز مگر بومیریک یاغی توتماق،
پئن دیری ساخلاییب پولا ساتماق؟
چؤلده هر عورت قاراباغی
نئهره ده چالخاییر گؤزل یاغی.
بیز مگر بیلمیریک تاخیل بیچمک؟
نیه لازیمدی ماشین اؤیرنمک؟
شؤخمه واجبدی چونکی بئش جوت کل،
بیچینه چین گرکدی، خیرمانا ول.
نه گرک دیر یازیب کی، اول ساده
فهله‌لر جنگ ائدیر آمئرکاده
بیلممیش رمزینی بو دنیانین
سؤیلییر حالینی آمئرکانین
هیچ دوغرو دئییل بونون نفسی،
نه غزئت دیر؟ تامام پول تله سی.
دئدیم: ای جاهیل کریه خطاب،
گرچی نادانه یوخدو هیچ جاواب.
بو غزئت کیم، اولوب جاهاندا بینا،
بونو کیم اختراع ائدیب آیا؟
هانسی ملت بونو ائدیب ایجاد؟
هانسی دولت ائدیب اونا امداد؟
ندیر اول ملتین گؤرک غرضی،
“هست البته در دلش مرضی” *
هامی ملتده وار غزئت لر چوخ
دئمه کیم، بوندا هیچ فایده یوخ.
غزئتین چوخدو خلقه منفعتی،
نه بیلیر کیم کی، یوخدو مرفعتی،
نه دئییم، وحی آسمانیدیر اول،
لیک ارباب حال جانیدیر اول
ام الاخبار، مخبرالآثار،
کاشف الرمز، واجب الاسرار،
لیک واجب دو شرح ائدیم حالی
سنی فی الجمله ا ائیله ییم حالی
رایض مالکان وادیی شوق،
قاید ساکینان عالم ذوق
رهبر و رهنورد و راه نما،
جبرییل امین اهل صفا.
اؤزونه ایله‌ییب همیتی فرض –
کی، ائده عالم ایچره طی العرض
گاه اولور اسب تلگرافه سوار
شرق دن غربه سؤیلییر اخبار.
گه قیلیر پوچتاخانه لرده مقام،
خلقه اخبار ائیله یر اعلام.
نه غزئت، مایۀ سعادت دیر
نه غزئت، عین ائتم حکمت دیر
خاصه ‘تفلیسکی وئستنیک”این خبری
یئتیشیر اهل عالمه ثمری.
بیر غزئت دیر کی، صادق الاخبار
مشتری سی نجوم تک بسیار.
خاصه “کاوکاز” کی، اهل قافقازه
هر زامان بیر خبر وئریر تازه.
خاصه اول کیم، “اکینچی”ی دانا،
اهل اسلامی ایله‌ییب احیا
گاه پئتئربورقدان اولور گویا،
گاه اولور هند شرق دن پیدا.
گاه دونای دان غزئت وئریر خبری،
گاه پاریس دن گلیر اونون اثری.
کشف ائدیر کارخانه دن ثمری،
سؤیله ییر هر کرال دن خبری.
———————————-
* البته، اوریینده دردی وار.