سیل تک گلمکده ائیلر شام هیجران اضطراب

دوستلار، کؤنلوم دیارین ائتدی ویران اضطراب،
ائیله‌دی اؤوراق ترکیبیم پریشان اضطراب.
هر کیمی کیم یاندیرار آتش، یانار اوندان بئتر،
حیله سین گر ائتمه سین اول برق جؤولان اضطراب.
قطره گر دریا اوچون بی تاب اولور معذوردور،
بیلمنم نئچون قیلیر دریای عمان اضطراب؟
من دئمم کیم دورگیلن آخشاماتک، یا صوبحه تک،
بئله آمما ائتمه ای سرو خورامان اضطراب.
نقد جان هر وقت اولا آخیر سنه تسلیم اولور،
ائیلمه قتلیمده چوخ، ای ناموسلمان، اضطراب.
عشق تک گئتمکده صوبح وصل بی آرام اولور،
سیل تک گلمکده ائیلر شام هیجران اضطراب.
هر بیری بیر رنگیله قؤوسی فغان کیم، قیلدیلار،
کؤنلومو آب انتظاری، باغریمی قان اضطراب.