سینیق مینا کیمی من سیزلاسام، بیجا دئگیل قؤوسی

سیزیلدار استخانیم، بیلمم ای جان، سن نه سیزلارسان؟
یانار برق بلادن اول نئییستان، سن نه سیزلارسان؟
کؤنول خون جیگردن جام گولگون تک لبالب دیر،
بو هامو عیش ایله، ای خانه ویران، سن نه سیزلارسان؟
بو گون من بی زبانم، بندِ بندیم یانسا عیب اولماز،
سنه مومکون دور، ای نئی آه و افغان، سن نه سیزلارسان؟
یانارسان مطلبینجه، ای سپند شوخ اودلاردا،
منیم تک گؤرمه‌میشسن داغ هیجران، سن نه سیزلارسان؟
من ای نئی اولموشام بیتاب اؤز فریاد وناله م دن،
بو یانار اود منی ائتمیش نئیستان، سن نه سیزلارسان؟
گرک دیر کیم، قفس قیدینده من فریاد ائدیم، بولبول،
میسّردیر سنه سئیر گولوستان، سن نه سیزلارسان؟
سینیق مینا کیمی من سیزلاسام، بیجا دئگیل قؤوسی،
بوکولموش قدّیله، ای تاغ نئیسان، سن نه سیزلارسان؟