ای برق ائتمه‌دین منه بیر قاتلا التفات

من امتیاز مسجید و مئیخانه بیلمنم،
یعنی کی، غیر ساقی و پئیمانه بیلمنم.
لال ائیله‌میش منیم دیلیمی حیرت، ای صبا،
بولبول سانیر کی، نالۀ مستانه بیلمنم.
تا بیر پیاله ساقی خونخوار وئرمه سه،
یوز کاسه قان اگر ایچرم، قانه بیلمنم.
ای خضر، عشق کویینه یارین آپار منی -
کیم، بس کی، سرخوشام ره پئیمانه بیلمنم.
ای شمع، من اول آتش روخسارین ایسترم،
پروانه تک نه ائدیم، هر اودا یانه بیلمنم.
ای ناله، سؤیله تانری اوچون هاندا دیر کؤنول،
ویرانمین یولون من دیوانه بیلمنم.
یوز مین دیل ایله دردیمی اول زولف یاریمه،
سن سؤیله، من بو دیللری ای شانه، بیلمنم.
هر یانه دوشسه قیبله نما سجده دیر ایشیم،
من انتخاب کعبه و بوتخانه بیلمنم.
ای عشق، اونون یانیندا آرادان گؤتور منی -
کیم، من اؤزومدن اؤزگه نی بیگانه بیلمنم.
ای برق ائتمه‌دین منه بیر قاتلا التفات،
ساندین مگر کی، اؤز اودوما یانه بیلمنم.
سیل فنا یئتیردی توزون عرشه کؤنلومون،
قؤوسی، هنوز من اونو ویرانه بیلمنم.