هان، سؤزون سنجیده قیل، قؤوسی «فضولی»-دن ائشیت

گؤرمه نم بیر همنفس تا ائیله ییم اظهار سؤز،
یوخسا کیم، نئی تک منیم سینه مده هم چوخ وار سؤز.
دوغرو سؤز هر کیمسه یه تأثیر ائدر، ناصح، ولی،
عاشیقی مست ائیلر و عاقل لری هوشیار سؤز.
صرفه سیزدیر گؤوهری اصرافیله صرف ائیله مک،
تا ضرورت دوشمیینجه سؤیلمن زینهار سؤز.
حکمت اؤگرن، اویما هر افسانه یه زینهار کیم،
هم یوخونو آرتیق ائیلر، هم قیلیر بیدار سؤز.
من اونونچون گؤز گؤتورمم چشم مستین دن اونون –
کیم، مکرر آندیریر ایما ایله بیمار سؤز.
دیدۀ بی نوردیر تأثیرسیز گفتار کیم،
گؤوهر غلتان اثردیر، ابر گؤوهربار سؤز.
بولهوس نظاره سیندن منده فریاد ائتمنم،
سؤز بیلن یانیندا هموار اولسا، ناهموار سؤز.
آجی آغیز یئی بیلیر قند مکرر لذتین،
ائتمه سین مندن دریغ اول لب شکّربار سؤز.
هر نگاهیندان گؤزون بیر اؤزگه منی آنلانیر –
کیم، پریشان و مشوش، چوخ دئییر بیمار سؤز.
هئچ دیل ایله شمع باشدان ائیله مز پروانه نی،
ائیلمه ضایع منه، ای آتشین روخسار سؤز.
بی زبانلیق ائیله‌دی عالم لره رسوا منی،
اول روش کیم، اؤزگه‌لر رازین قیلیر اظهار سؤز.
گؤوهر سیرابی ائتمزلر خزف دن امتیاز،
یوخسا دریالرجه قؤوسی قطره لرده وار سؤز.
هان، سؤزون سنجیده قیل، قؤوسی «فضولی»-دن ائشیت:
«کیم نه مقدار اولسا اهلین ائیلر اول مقدار سؤز».