بس دیر بیزه گر آنلایان اولسا اشاره میز

ضعف ایله گرچی غنچه لنیب دیر سیتاره میز،
افلاک خرمنینه وورار اود شراره میز.
قاش ایله گؤز دیلینی بیلن اهل دیل بیلیر –
کیم، بیر کیتاب سؤز باشی دیر هر اشاره میز.
آیلار کئچر کی، شمع وصالینی بولمانیز،
بو ایل بیزی نه گونلره سالدی سیتاره میز.
هر بخیه نین گؤزو بیزه بیر چشم زخمی دیر،
توتدوم کی، بخیه ائتمک ایله بیتدی یاره میز.
بولبوللره خزاندا وئرین موژده کیم، توتار،
گول یارپاغی یئرین جیگر پاره-پاره میز.
زینهار بخیه سینی چوخ اینجیتمه کیرپیگین،
دؤنمز قیلینج لاریله اوزوندن نظاره میز.
گر یار سرگران اولا، گر چرخ بی امان،
بیچاره لیکدن اؤزگه ندیر دخی چاره میز.
گر لاله بیتسه قبریمیز اوستونده راضی ییز،
یارب کی، بیتمه سین بو بیزیم قانلی یاره میز.
قؤوسی، اگرچی ائیله‌مه‌دین عرض حال اونا،
بس دیر بیزه گر آنلایان اولسا اشاره میز.