سینیق سبوده سو توتماز قرار، مئی دورماز

دیلیم فغانیله و دیده قان ایلن دولودور،
کؤنول صحیفه سی شرح و بیان ایلن دولودور.
ووروبدور آغزینا مین قفل آهنین غیرت،
هنوز سقف فلک ال-امان ایلن دولودور.
هارای کیم، نه دیلیم وار، نه بیر دیل آنلایانیم،
اگرچی نئی کیمی جیسمیم فغان ایلن دولودور.
اگرچی کؤنلومه ظاهرده دَیمَک آسان دیر،
بو چؤل کمین گهی شیرین-جیان ایلن دولودور.
سینیق سبوده سو توتماز قرار، مئی دورماز،
شیکسته کؤنلومه مَهوَم کی، قان ایلن دولودور.
خوماریلن منی اؤلدوردو ساقی بی رحم،
سبوی بادۀ گولرنگ جان ایلن دولودور.
بو بیر پیاله ده یارب، نه سئهر ائدیب ساقی –
کی، اوستو باده ایلن، آلتی قان ایلن دولودور.
بصیرت اهلی دلیل ایستمز کی، کون و مکان،
نشان ایلن دولودور، بی نشان ایلن دولودور.
یووادا غنچه لنیر عندلیب بس کی، چمن،
نوای قؤوسی آتش زبان ایلن دولودور.