سیل فریاد ائیله‌ییب دامان کوهسار آختاریر

کیم کی، بو عالمده عؤمرون صرف ائدیب یار آختاریر،
گنج گؤوهر داغیدیب ویرانه ده مار آختاریر.
بس کی، وئرمز یوخو گؤز آچماغا فرصت کیمسه یه،
صوبح گون شمع ایله هر گون چشم بیدار آختاریر.
چیخمادی مجنون گئدن دن سونرا بیر شیدا سسی،
عؤمرولردیر کیم، طبیب عشق بیمار آختاریر.
بس کی، خط اول کؤوکب حوسنون گونون ائتمیش قارا،
زولف روخسار چیراغیله گرفتار آختاریر.
پردۀ دام ائیله‌میش زاهید رداسین خلق اوچون،
قاپیلاردا سبهه فالی بیرله زنّار آختاریر.
یوخ، دخی کؤنلوم منیم میخانه یه مایل دئییل،
کیم گزیب ائو-ائو خرابات ایچره هوشیار آختاریر.
دامنین دن ال، آیاق دان دوشمه ییله چکمنم،
کؤنلوم اول عایشه رویه تا نفس وار آختاریر.
باشی ازبس کیم، بیزیم چؤللرده دیمیش داشلارا،
سیل فریاد ائیله‌ییب دامان کوهسار آختاریر.
اؤزگه رونق وار قؤوسی، حوسن بازاریندا کیم،
بیر متاع اوندا ایکی عالم خریدار آختاریر.