ذاکیر خسته دیلین، گؤر، نه یامان ابرولر

منی بیر شوخ بو گون خانه-خاراب ائتدی یئنه،
آلدی آرامیمی، بی طاقت و تاب ائتدی یئنه،
بورقه اوزدن گؤتوروب، کشت نقاب ائتدی یئنه،
دیل مجروحو پریشانی کباب ائتدی یئنه،
دیده می اشک درون ایله پر آب ائتدی یئنه.

گون کیمی شعله وئریب سینه ده ابیز بدنی،
تازه دن عشقه سالیب مست و جنون ائتدی منی،
ساچی جانلار یاتاغی، تئللری دیللر وطنی،
کفر زلفو تالاییب چینی، ختی و ختنی،
لشکر خال و خطی هینده جواب ائتدی یئنه.

کئچدی ایام زمستان، گلیب فصل باهار،
ائیله‌ییب سئیر چمن ناز ایله اول طورفه نگار،
بیله سینجه دف و نئی، ساقی و ساغر، نه کی وار،
ایچیبن جام محبتدن، اولوب مست وخومار،
آچیبان بند قبا، لرک حجاب ائتدی یئنه.

بار هجرایله «الیف» قددیمی «نون» ائتمیش ایدی،
آرزوسوندا قارا باغریمی خون ائتمیش ایدی.
روزگاریمی سیه خالی زبون ائتمیش ایدی،
گرچی اول منی سرمست و جنون ائتمیش ایدی،
اؤلدوروب، قویمادی، آخردا ثواب ائتدی یئنه.

مژه و قرازه و گؤز، بیرده کامان ابرولر،
هامی بیر یانه و بیر یانه هامان ابرولر،
بیر قاتی یایدورور دانه نشان ابرولر،
ذاکیر خسته دیلین، گؤر، نه یامان ابرولر،
جسم زارین هدف تیر شهاب ائتدی یئنه.