ذاکیرم، ائیله دین عقلیمی زاییل

آ لبلری باده، آغزی پیاله!
بیر سؤز دئسم اولما بیدماق، سانا.
یئتیشیبسن، ایندن بئله یاراشماز
یادلارایله دئییب-دانیشماق سانا.

عجب بی حیادیر چرخ کجرفتار،
هر آیدا بیرهیلال ائیلر آشکار؛
شک سیز سنین ایله عداوتی وار،
گؤستریر دوشنده قاشقاباق سانا.

معدنی سن فعلین، ناز و غمزه نین،
برابرین یوخدو عالمده سنین؛
تحریک ائیله‌مه سه صبا، غنچه نین،
آغزی ندیر آچا دل-دوداق سانا؟!

جواهیر قولباقلار بیاز بیلَیی،
گاهی قوجار، گاهی ائیلر هنَیی،
بهشتین حوری سی، گؤیون ملَیی
یئتیشمز، یوز چالا ال-آیاق، سانا.

ذاکیرم، ائیله دین عقلیمی زاییل،
اولماز بئله صورت، بئله شماییل؛
ائله من دئییلم حوسنونه ماییل،
گؤز دیکیب دیر تامام قاراباغ سانا.