یوخ اولوب ذاکیرین واری

نئیلمیشم، اینجیمیسن؟
یئنه، ای گول بدن، مندن؟
ظاهراَ، واردیر تزه دن،
سنه بیر سؤز دئین مندن؟

غم ائوینده زار اولالی،
عشقه گرفتار اولالی،
یاریمادیق یار اولالی،
نه من سندن، نه سن مندن.

مایلم چشم غزاله،
اولموشام درده حواله.
ال گؤتورمز آه و ناله،
گئجه‌لر صبحه دن مندن.

پریشان ائتدین حالیمی،
اَییبسن قدد دالیمی؛
نه دئییم، تانری ظالمی،
خبر آلسا، گؤره ن، مندن؟

یوخ اولوب ذاکیرین واری،
گون به گون آرتار زاری؛
خبردار ائیله یین یاری،
ای آللاهی سئون، مندن.