حیدربابا ایلدیریملار شاخاندا
سئللر سولار شاققیلدییوب آخاندا
قیزلار اونا صف باغلییوب باخاندا
سلام اولسون شؤکتوزه ائلوزه !
منیم دا بیر آدیم گلسین دیلوزه
حیدربابا، کهلیک لرون اوچاندا
کول دیبینن دوشان قالخوب قاچاندا
باخچالارون چیچکلنوب آچاندا
بیزدن ده بیر مۆمکون اولسا یاد ائله
آچیلمیان اۆرکلری شاد ائله
بایرام یئلی چارداخلاری ییخاندا
نوروز گۆلی، قارچیچکی چیخاندا
آغ بولوتلار کؤینکلرین سیخاندا
بیزدن ده بیر یاد ائلیین ساغ اولسون
دردلریمیز قوی دیکلسین، داغ اولسون
حیدربابا، گۆن دالووی داغلاسین !
اۆزون گۆلسون، بولاخلارون آغلاسین !
اوشاخلارون بیر دسته گۆل باغلاسین !
یئل گلنده، وئر گتیرسین بویانا
بلکه منیم یاتمیش بختیم اویانا
حیدربابا، سنۆن اۆزون آغ اولسون !
دؤرت بیر یانون بولاغ اولسون باغ اولسون !
بیزدن سورا سنۆن باشون ساغ اولسون !
دۆنیا قضو-قدر، اؤلوم-ایتیمدی
دۆنیا بویی اوغولسوزدی، یئتیمدی
حیدربابا، یولوم سنن کج اولدی
عؤمروم کئچدی، گلممهدیم، گئج اولدی
هئچ بیلمهدیم گؤزللرون نئج اولدی
بیلمزیدیم دؤنگهلر وار، دؤنوم وار
ایتگین لیک وار، آیریلیق وار، اؤلوم وار
حیدربابا، ایگیت اَمَک ایتیرمز
عؤمور کئچر، افسوس بَرَه بیتیرمز
نامرد اولان عؤمری باشا یئتیرمز
بیز ده، واللاه، اونوتماریق سیزلری
گؤرنمسک حلال ائدون بیزلری
حیدربابا، میراژدر سَسلننده
کَند ایچینه سسدن - کۆیدن دۆشنده
عاشیق رستم سازین دیللندیرنده
یادوندادی نه هؤلَسَک قاچاردیم
قوشلار تکین قاناد آچیب اوچاردیم
شنگیل آوا یوردی، عاشیق آلماسی
گاهدان گئدوب، اوردا قوناق قالماسی
داش آتماسی، آلما، هیوا سالماسی
قالیب شیرین یوخی کیمین یادیمدا
اثر قویوب روحومدا، هر زادیمدا
حیدربابا، قوری گؤلون قازلاری
گدیکلرین سازاخ چالان سازلاری
کَت کؤشنین پاییزلاری، یازلاری
بیر سینما پرده سی دیر گؤزومده
تک اوتوروب، سئیر ائدرم اؤزومده
حیدربابا، قره چمن جاداسی
چْووشلارین گَلَر سسی، صداسی
کربلیا گئدنلرین قاداسی
دۆشسون بو آج یولسوزلارین گؤزونه
تمدّونون اویدوخ یالان سؤزونه
حیدربابا، شیطان بیزی آزدیریب
محبتی اۆرکلردن قازدیریب
قره گۆنون سرنوشتین یازدیریب
سالیب خلقی بیر-بیرینن جانینا
باریشیغی بلشدیریب قانینا
گؤز یاشینا باخان اولسا، قان آخماز
انسان اولان خنجر بئلینه تاخماز
آمما حئییف کور توتدوغون بوراخماز
بهشتیمیز جهنّم اولماقدادیر !
ذی حجّه میز محرّم اولماقدادیر !
خزان یئلی یارپاخلاری تؤکنده
بولوت داغدان یئنیب، کنده چؤکنده
شیخ الاسلام گؤزل سسین چکنده
نیسگیللی سؤز اۆرکلره دَیَردی
آغاشلار دا آللاها باش اَیَردی
داشلی بولاخ داش-قومونان دولماسین !
باخچالاری سارالماسین، سولماسین !
اوردان کئچن آتلی سوسوز اولماسین !
دینه : بولاخ، خیرون اولسون آخارسان
افقلره خُمار-خُمار باخارسان
حیدر بابا، داغین، داشین، سره سی
کهلیک اوخور، دالیسیندا فره سی
قوزولارین آغی، بوزی، قره سی
بیر گئدیدیم داغ-درهلر اوزونی
اوخویئدیم : "چوبان، قیتر قوزونی"
حیدر بابا، سولی یئرین دۆزونده
بولاخ قئنیر چای چمنین گؤزونده
بولاغ اوتی اۆزَر سویون اۆزونده
گؤزل قوشلار اوردان گلیب، گئچللر
خلوتلیوب، بولاخدان سو ایچللر
بیچین اۆستی، سونبول بیچن اوراخلار
ایله بیل کی، زۆلفی دارار داراخلار
شکارچیلار بیلدیرچینی سوراخلار
بیچین چیلر آیرانلارین ایچللر
بیر هوشلانیب، سوننان دوروب، بیچللر
حیدربابا، کندین گۆنی باتاندا
اوشاقلارون شامین یئییوب، یاتاندا
آی بولوتدان چیخوب، قاش-گؤز آتاندا
بیزدن ده بیر سن اونلارا قصّه دئه
قصّهمیزده چوخلی غم و غوصّه دئه
قاری ننه گئجه ناغیل دییَنده
کۆلک قالخیب، قاپ-باجانی دؤیَنده
قورد گئچینین شنگۆلوسون یینده
من قاییدیب، بیرده اوشاق اولئیدیم
بیر گۆل آچیب، اوندان سورا سولئیدیم
عمّه جانین بال بلله سین ییه ردیم
سوننان دوروب، اۆس دونومی گییه ردیم
باخچالاردا تیرینگَنی دییه ردیم
آی اؤزومی او ازدیرن گۆنلریم !
آغاج مینیپ، آت گزدیرن گۆنلریم !
هَچی خالا چایدا پالتار یوواردی
مَمَد صادق داملارینی سوواردی
هئچ بیلمزدیک داغدی، داشدی، دوواردی
هریان گلدی شیلاغ آتیب، آشاردیق
آللاه، نه خوش غمسیز-غمسیز یاشاردیق
شیخ الاسلام مُناجاتی دییه ردی
مَشَدرحیم لبّاده نی گییه ردی
مشْدآجلی بوز باشلاری ییه ردی
بیز خوشودوق خیرات اولسون، توی اولسون
فرق ائلَمَز، هر نولاجاق، قوی اولسون
ملک نیاز ورندیلین سالاردی
آتین چاپوپ قئیقاجیدان چالاردی
قیرقی تکین گدیک باشین آلاردی
دولائیا قیزلار آچیپ پنجره
پنجره لرده نه گؤزل منظره !
حیدربابا، کندین تویون توتاندا
قیز-گلینلر، حنا-پیلته ساتاندا
بیگ گلینه دامنان آلما آتاندا
منیم ده او قیزلاروندا گؤزوم وار
عاشیقلارین سازلاریندا سؤزوم وار
حیدربابا، بولاخلارین یارپیزی
بوستانلارین گۆلبَسَری، قارپیزی
چرچیلرین آغ ناباتی، ساققیزی
ایندی ده وار داماغیمدا، داد وئرر
ایتگین گئدن گۆنلریمدن یاد وئرر
بایرامیدی، گئجه قوشی اوخوردی
آداخلی قیز، بیگ جورابی توخوردی
هرکس شالین بیر باجادان سوخوردی
آی نه گؤزل قایدادی شال ساللاماق !
بیگ شالینا بایراملیغین باغلاماق !
شال ایستهدیم منده ائوده آغلادیم
بیر شال آلیب، تئز بئلیمه باغلادیم
غلام گیله قاشدیم، شالی ساللادیم
فاطمه خالا منه جوراب باغلادی
خان ننه می یادا سالیب، آغلادی
حیدربابا، میرزَممدین باخچاسی
باخچالارین تورشا-شیرین آلچاسی
گلینلرین دۆزمه لری، طاخچاسی
هی دۆزولر گؤزلریمین رفینده
خیمه وورار خاطرهلر صفینده
بایرام اولوب، قیزیل پالچیق اَزَللر
ناققیش ووروب، اوتاقلاری بَزَللر
طاخچالارا دۆزمهلری دۆزللر
قیز-گلینین فندقچاسی، حناسی
هَوَسله نر آناسی، قایناناسی
باکی چی نین سؤزی، سووی، کاغیذی
اینکلرین بولاماسی، آغوزی
چرشنبه نین گیردکانی، مویزی
قیزلار دییر :» آتیل ماتیل چرشنبه
آینا تکین بختیم آچیل چرشنبه «
یومورتانی گؤیچک، گوللی بویاردیق
چاققیشدیریب، سینانلارین سویاردیق
اویناماقدان بیرجه مگر دویاردیق ؟
علی منه یاشیل آشیق وئرردی
ارضا منه نوروزگۆلی درردی
نوروز علی خرمنده وَل سۆرردی
گاهدان یئنوب، کۆلشلری کؤرردی
داغدان دا بیر چوبان ایتی هۆرردی
اوندا، گؤردون، اولاخ ایاخ ساخلادی
داغا باخیب، قولاخلارین شاخلادی
آخشام باشی ناخیرینان گلنده
قودوخلاری چکیب، ووراردیق بنده
ناخیر گئچیب، گئدیب، یئتنده کنده
حیوانلاری چیلپاق مینیب، قوواردیق
سؤز چیخسایدی، سینه گریب، سوواردیق
یاز گئجه سی چایدا سولار شاریلدار
داش-قَیهلر سئلده آشیب خاریلدار
قارانلیقدا قوردون گؤزی پاریلدار
ایتلر، گؤردون، قوردی سئچیب، اولاشدی
قورددا، گؤردون، قالخیب، گدیکدن آشدی
قیش گئجه سی طؤلهلرین اوتاغی
کتلیلرین اوتوراغی، یاتاغی
بوخاریدا یانار اوتون یاناغی
شبچره سی، گیردکانی، ایده سی
کنده باسار گۆلوب - دانیشماق سسی
شجاع خال اوغلونون باکی سوقتی
دامدا قوران سماواری، صحبتی
یادیمدادی شسلی قدی، قامتی
جؤنممه گین تویی دؤندی، یاس اولدی
ننه قیزین بخت آیناسی کاس اولدی
حیدربابا، ننه قیزین گؤزلری
رخشنده نین شیرین-شیرین سؤزلری
ترکی دئدیم اوخوسونلار اؤزلری
بیلسینلر کی، آدام گئدر، آد قالار
یاخشی-پیسدن آغیزدا بیر داد قالار
یاز قاباغی گۆن گۆنئیی دؤیَنده
کند اوشاغی قار گۆلله سین سؤیَنده
کۆرکچی لر داغدا کۆرک زۆیَنده
منیم روحوم، ایله بیلون اوردادور
کهلیک کیمین باتیب، قالیب، قاردادور
قاری ننه اوزاداندا ایشینی
گۆن بولوتدا اَییرردی تشینی
قورد قوجالیب، چکدیرنده دیشینی
سوری قالخیب، دولائیدان آشاردی
بایدالارین سۆتی آشیب، داشاردی
خجّه سلطان عمّه دیشین قیساردی
ملا باقر عم اوغلی تئز میساردی
تندیر یانیب، تۆسسی ائوی باساردی
چایدانیمیز ارسین اۆسته قایناردی
قوورقامیز ساج ایچینده اویناردی
بوستان پوزوب، گتیرردیک آشاغی
دولدوریردیق ائوده تاختا-طاباغی
تندیرلرده پیشیرردیک قاباغی
اؤزون یئییوب، توخوملارین چیتداردیق
چوخ یئمکدن، لاپ آز قالا چاتداردیق
ورزغان نان آرموت ساتان گلنده
اوشاقلارین سسی دۆشردی کنده
بیزده بویاننان ائشیدیب، بیلنده
شیللاق آتیب، بیر قیشقریق سالاردیق
بوغدا وئریب، آرموتلاردان آلاردیق
میرزاتاغی نان گئجه گئتدیک چایا
من باخیرام سئلده بوغولموش آیا
بیردن ایشیق دۆشدی اوتای باخچایا
ای وای دئدیک قورددی، قئیتدیک قاشدیق
هئچ بیلمه دیک نه وقت کۆللوکدن آشدیق
حیدربابا، آغاجلارون اوجالدی
آمما حئییف، جوانلارون قوجالدی
توخلیلارون آریخلییب، آجالدی
کؤلگه دؤندی، گۆن باتدی، قاش قَرَلدی
قوردون گؤزی قارانلیقدا بَرَلدی
ائشیتمیشم یانیر آللاه چیراغی
دایر اولوب مسجدیزون بولاغی
راحت اولوب کندین ائوی، اوشاغی
منصورخانین الی-قولی وار اولسون
هاردا قالسا، آللاه اونا یار اولسون
حیدربابا، ملا ابراهیم وار، یا یوخ ؟
مکتب آچار، اوخور اوشاقلار، یا یوخ ؟
خرمن اۆستی مکتبی باغلار، یا یوخ ؟
مندن آخوندا یتیررسن سلام
ادبلی بیر سلامِ مالاکلام
خجّه سلطان عمّه گئدیب تبریزه
آمما، نه تبریز، کی گلممیر بیزه
بالام، دورون قویاخ گئداخ ائممیزه
آقا اؤلدی، توفاقیمیز داغیلدی
قویون اولان، یاد گئدوبَن ساغیلدی
حیدربابا، دۆنیا یالان دۆنیادی
سلیماننان، نوحدان قالان دۆنیادی
اوغول دوغان، درده سالان دۆنیادی
هر کیمسَیه هر نه وئریب، آلیبدی
افلاطوننان بیر قوری آد قالیبدی
حیدربابا، یار و یولداش دؤندولر
بیر-بیر منی چؤلده قویوب، چؤندولر
چشمه لریم، چیراخلاریم، سؤندولر
یامان یئرده گؤن دؤندی، آخشام اولدی
دۆنیا منه خرابهٔ شام اولدی
عم اوغلینان گئدن گئجه قیپچاغا
آی کی چیخدی، آتلار گلدی اویناغا
دیرماشیردیق، داغلان آشیردیق داغا
مش ممی خان گؤی آتینی اویناتدی
تفنگینی آشیردی، شاققیلداتدی
حیدربابا، قره کولون دره سی
خشگنابین یولی، بندی، بره سی
اوردا دۆشَر چیل کهلیگین فره سی
اوردان گئچر یوردوموزون اؤزونه
بیزده گئچک یوردوموزون سؤزونه
خشگنابی یامان گۆنه کیم سالیب ؟
سیدلردن کیم قیریلیب، کیم قالیب ؟
آمیرغفار دام-داشینی کیم آلیب ؟
بولاخ گنه گلیب، گؤلی دولدورور ؟
یا قورویوب، باخچالاری سولدورور ؟
آمیر غفار سیدلرین تاجییدی
شاهلار شکار ائتمه سی قیقاجییدی
مَرده شیرین، نامرده چوخ آجییدی
مظلوملارین حقّی اۆسته اَسَردی
ظالم لری قیلیش تکین کَسَردی
میر مصطفا دایی، اوجا بوی بابا
هیکللی،ساققاللی، تولستوی بابا
ائیلردی یاس مجلسینی توی بابا
خشگنابین آبروسی، اَردَمی
مسجدلرین، مجلسلرین گؤرکَمی
مجدالسّادات گۆلردی باغلارکیمی
گۆرولدردی بولوتلی داغلارکیمی
سؤز آغزیندا اریردی یاغلارکیمی
آلنی آچیق، یاخشی درین قاناردی
یاشیل گؤزلر چیراغ تکین یاناردی
منیم آتام سفره لی بیر کیشییدی
ائل الیندن توتماق اونون ایشییدی
گؤزللرین آخره قالمیشییدی
اوننان سورا دؤنرگهلر دؤنوبلر
محبّتین چیراخلاری سؤنوبلر
میرصالحین دلی سولوق ائتمه سی
میر عزیزین شیرین شاخسِی گئتمه سی
میرممّدین قورولماسی، بیتمه سی
ایندی دئسک، احوالاتدی، ناغیلدی
گئچدی، گئتدی، ایتدی، باتدی، داغیلدی
میر عبدولون آیناداقاش یاخماسی
جؤجیلریندن قاشینین آخماسی
بویلانماسی، دام-دوواردان باخماسی
شاه عبّاسین دۆربونی، یادش بخیر !
خشگنابین خوش گۆنی، یادش بخیر !
ستاره عمّه نزیک لری یاپاردی
میرقادر ده، هردم بیرین قاپاردی
قاپیپ، یئیوب، دایچا تکین چاپاردی
گۆلمه لیدی اونون نزیک قاپپاسی
عمّه مین ده ارسینینین شاپپاسی
حیدربابا، آمیر حیدر نئینیور ؟
یقین گنه سماواری قئینیور
دای قوجالیب، آلت انگینن چئینیور
قولاخ باتیب، گؤزی گیریب قاشینا
یازیق عمّه، هاوا گلیب باشینا
خانم عمّه میرعبدولون سؤزونی
ائشیدنده، ایر آغز-گؤزونی
مَلْکامِدا وئرر اونون اؤزونی
دعوالارین شوخلوغیلان قاتاللار
اتی یئیوب، باشی آتیب، یاتاللار
فضّه خانم خشگنابین گۆلییدی
آمیریحیا عمقزینون قولییدی
رُخساره آرتیستیدی، سؤگولییدی
سیّد حسین، میر صالحی یانسیلار
آمیرجعفر غیرتلی دیر، قان سالار
سحر تئزدن ناخیرچیلار گَلَردی
قویون-قوزی دام باجادا مَلَردی
عمّه جانیم کؤرپهلرین بَلَردی
تندیرلرین قوزاناردی تۆسیسی
چؤرکلرین گؤزل اییی، ایسیسی
گؤیرچینلر دسته قالخیب، اوچاللار
گۆن ساچاندا، قیزیل پرده آچاللار
قیزیل پرده آچیب، ییغیب، قاچاللار
گۆن اوجالیب، آرتارداغین جلالی
طبیعتین جوانلانار جمالی
حیدربابا، قارلی داغلار آشاندا
گئجه کروان یولون آزیب، چاشاندا
من هارداسام، تهراندا یا کاشاندا
اوزاقلاردان گؤزوم سئچر اونلاری
خیال گلیب، آشیب، گئچر اونلاری
بیر چیخئیدیم دام قیه نین داشینا
بیر باخئیدیم گئچمیشینه، یاشینا
بیر گورئیدیم نهلر گلمیش باشینا
منده اْونون قارلاریلان آغلاردیم
قیش دوندوران اۆرکلری داغلاردیم
حیدربابا، گۆل غنچه سی خنداندی
آمما حئیف، اۆرک غذاسی قاندی
زندگانلیق بیر قارانلیق زینداندی
بو زیندانین دربچه سین آچان یوخ
بو دارلیقدان بیرقورتولوب، قاچان یوخ
حیدربابا گؤیلر بۆتون دوماندی
گونلریمیز بیر-بیریندن یاماندی
بیر-بیرۆزدن آیریلمایون، آماندی
یاخشیلیغی الیمیزدن آلیبلار
یاخشی بیزی یامان گۆنه سالیبلار
بیر سوروشون بو قارقینمیش فلکدن
نه ایستیور بو قوردوغی کلکدن ؟
دینه گئچیرت اولدوزلاری الکدن
قوی تؤکولسون، بو یئر اۆزی داغیلسین
بو شیطانلیق قورقوسی بیر ییغیلسین
بیر اوچئیدیم بو چیرپینان یئلینن
باغلاشئیدیم داغدان آشان سئلینن
آغلاشئیدیم اوزاق دۆشَن ائلینن
بیر گؤرئیدیم آیریلیغی کیم سالدی
اؤلکه میزده کیم قیریلدی، کیم قالدی
من سنون تک داغا سالدیم نَفَسی
سنده قئیتر، گۆیلره سال بو سَسی
بایقوشوندا دار اولماسین قفسی
بوردا بیر شئر داردا قالیب، باغیریر
مروّت سیز انسانلاری چاغیریر
حیدربابا، غیرت قانون قاینارکن
قره قوشلار سنن قوپوپ، قالخارکن
او سیلدیریم داشلارینان اوینارکن
قوزان، منیم همّتیمی اوردا گؤر
اوردان اَییل، قامتیمی داردا گؤر
حیدربابا . گئجه دورنا گئچنده
کوراوغلونون گؤزی قارا سئچنده
قیر آتینی مینیب، کسیب، بیچنده
منده بوردان تئز مطلبه چاتمارام
عیوض گلیب، چاتمیونجان یاتمارام
حیدربابا، مرد اوغوللار دوغگینان
نامردلرین بورونلارین اوغگینان
گدیکلرده قوردلاری توت، بوغگینان
قوی قوزولار آیین-شایین اوتلاسین
قویونلارون قویروقلارین قاتلاسین
حیدربابا، سنۆن گؤیلون شاد اولسون
دۆنیا وارکن، آغزون دولی داد اولسون
سنن گئچن تانیش اولسون، یاد اولسون
دینه منیم شاعر اوغلوم شهریار
بیر عمر دۆر غم اۆستونه غم قالار