آتامیز یوردی

آتامیز یوردی بولونمکده دیمه اویناش آراسیندا
بولونر یوزیاشینون جرمه سی فراش آراسیندا
آتامیز(کوروشی) دنیا یاسوبن دخمه سی ایچره
آنامیز ایرانی بولمکده دیر اویناش آراسیندا
داراشوب جانیمه دشمن هره بیر دیش قوپاریلار
بو یتیم مالی قالوب بیر سوری کلاش آراسیندا
باخ نجه قیزلاری، عورتلری، سائلیک ائدیلر
ملتین ناموسی دیر، فیرلانیر اوباش آراسیندا
تاپسا ملت یاوان آش، ئوزلری بوزباشی یسینلر
گنه بیر نسبت اولور آشیله بوزباش آراسیندا
قره ملت قالوب آج، جانی گئدیر، اوستلیک ایمان
بولونور باغ بالی اربابیله آغ باش آراسیندا
آش ایچنده علما آز قالیر اودسون قاشیقندا
نیلسون شک ائلیوب قاشیقلن آش آراسیندا
آغ گورچین، نه روادیر که ایشیقلیق، قوشی سن تک
یاتا بایقوش یوواسیندا قالا خفاش آراسیندا
گوز یاشیمسان سن آراز قویما گوزوم باخادا گورسون
نه یامان پرده چکوبسن ایکی قارداش آراسیندا
دئمه داغ داشدی سلیمان سنی مندن آییران شئی
بیر چیبباندیر کی چیخوب دور گوزیلن قاش آراسیندا
خلقی دارتیر، بو دگرمان داشی تک داغلاری ایله
بیزی دارتاندا قالایدی الی بیر داش آراسیندا
شهریار سن یازان اشعاری اوزاقدان تانیرام من
بیر ایوشماخ داغی وار نقشیله نقاش آراسیندا