منو
آزادلیق قوشی وارلیق
هرچند قوتولماق هله یوخ دارلیغیمیزدان
اما بیر آزادلیق دوغولوب وارلیغیمیزدان
(وارلیق) نه بیزیم تکجه آزادلیق قوشوموزدیر
بیر مژده ده وئرمیش بیزه همکارلیغیمیزدان
به به نه شیرین دیللی، بو جنت قوشی، طوطی
قندین آلیب الهام ایله دیندار لیغیمیزدان
دیل آچمادا کارلیق دا گئدر، کورلوغوموزدا
چون لاللیغیمیز دوغموش ایدی کارلیغیمیزدان
دشمن بیزی ال بیر گؤره، تسلیم اولی ناچار
تسلیم اولوروق دشمنه ناچار لیغیمیزدان
هر انقلابین وور-ییخی سون بنّالیق ایستر
دستور گرگ آلماق داها معمار لیغیمیزدان
هشیار اولاسوز، دشمنی مغلوب ائده جکسیز
دشمنلریمیز قورخوری هوشیار لیغیمیزدان
بیرلیک یارادون، سؤز بیر اولار بیز کیشی لرده
یوخلوقلاریمیز بیتدیره جک وار لیغیمیزدان