منو
سهندیم!
سهندیم!
شاه داغیم، چال پاپاغیم، ائل دایاغیم، شانلی سهندیم،
باشی توفانلی سهندیم،
باشدا حیدر بابا تک قارلا، قیروولا قاریشیب سان،
سون ایپک تئللی بولودلارلا اوفوقده ساریشیب سان،
ساواشارکن باریشیب سان.
گؤیدن ایلهام آلالی سرری سماواتا دئیه رسن،
هله آغ کورکو بورون، یازدا یاشیل دون دا گئیه رسن،
قورادان حالوا یئیه رسن.
دؤشلرینده صونالار سینه سی تک شوخ ممه لرده،
نه شرین چشمه‌لرین وار.
او یاشیل تئللری، یئل هؤرمه ده آینالی سحرده،
عشوه لی ائشمه‌لرین وار،
قوی یاغیش یاغسادا یاغسین،
سئل اولوب آخسادا آخسین،
یانلاریندا دره‌لر وار،
قوی قلمقاشلارین اوچسون فره لرله، هامی باخسین،
دوشلرونده هئره‌لر وار،
سیلدیریملار، سره‌لر وار،
او اتک لرده نه قیزلار یاناغی لاله‌لرین وار،
قوزولار اوتلایاراق نئی ده نه خوش ناله‌لرین وار،
آی کیمی هاله‌لرین وار،
گول چیچکدن بزه ننده، نه گلین لر کیمی نازین،
یئل اسنده او سولاردا نه درین راز-و نیازین،
اوینایار گوللو قوتازین،
تیتره ییر ساز تئلی تک شاخه‌لرین چایدا چمنده،
یئل او تئللرده گزه نده، نه کوراوغلو چالی سازین،
اؤرده یین خلوت ائدیب گؤلده پریلرله چیمنده،
قول-قاناددان اونا آغ حوله آچار غمزه لی قازین،
قیش گئد ر، قوی گله یازین،
هله نووروز گولو وار، قار چیچیین وار، گله جکلر،
اوزلرین تئز سیله جکلر،
قیشدا کهلیک هوسیله، چؤله قاچدیقدا جاوانلار،
قاردا قاققیلدایاراق نازلی قلمقاشلارین اولسون،
یاز، او دؤشلرده ناهار منده سین آچدیقدا چوبانلار،
بوللو سودلو سورولر، دادلی قاووتماشلارین اولسون،
آد آلیب سندن او شاعیر کی سن اوندان آد آلارسان،
اونا هر داد وئره سن، یوز او مقابل داد آلارسان،
تاریدان هر زاد آلارسان،
آداق اولدیقدا، سن اونلا داها آرتیق اوجالارسان،
باش اوجالدیقدا دماوند داغیندان باج آلارسان،
شئر الیندن تاج آلارسان،
اودا شعرین، ادبین شاه داغیدیر، شانلی سهندی،
اودا سن تک آتار اولدیزلارا شعریله کمندی،
اودا سیمرغ دان آلماقدادی فندی،
شعر یازاندا قلمیندن باخاسان دورر سپه لندی،
سانکی اولدیزلار الندی،
سؤز دئینده گؤره سن قاتدی گولو، پوسته نی، قندی،
یاشاسین شاعیر افندی،
او نه شاعیر، کی داغین وصفینه مصداق اونو گؤردوم،
من سنین تک اوجالیق مشقینه مشاق اونو گؤردوم،
عشقه، عشق اهلینه مشتاق اونو گؤردوم،
او نه شاعیر، کی خیال مرکبینه شو وشیغایاندا،
او نهنگ آت، آیاغین توزلو بولودلاردا قویاندا،
لوله لنمکده‌دی یئر-گؤی، نئجه طومار ساریاندا،
گؤره جکسن او زاماندا:،
نه زامان وارسا، مکان وارسا کسیب بیچدی بیر آندا،
گئچه جکلر، گله جکلر نه بویاندا، نه او یاندا،
نه بلیلم قالدی هایاندا؟
باخ نه حرمت وار اونون اؤز دئمیشی توک پاپاغیندا،
شعرینین تاجی اییلمیش باشی دورموش قاباغیندا،
باشینا ساوریلان اینجی، چاریق اولموش آیاغیندا،
وحی دیر شعری، ملکلردی پیچیلدار قولاغیندا،
آیه لردیر دوداغیندا،
شهدی وار بال دوداغیندا،
اودا داغلار کیمی شأنینده نه یازسام یاراشاندیر،
اودا ظالیم قوپاران قارلا، کولکله دوروشاندیر،
قودوزا، ظالیمه قارشی سینه گرمیش، ووروشاندیر،
قودوزون کورکونه، ظالیم بیره‌لر تک داراشاندیر،
آمما وجهیدهفقیر خالقی اییلمیش سوروشاندیر،
قارا ملتده هنر بولسا، هنرله آراشاندیر،
قارالارلا قاریشاندیر،
ساریشاندیر،
گئجه حقین گؤزودور، طور تؤره تمیش اوجاغیندا،
اریییب باغ تک اور کلردی یانارلار چیراغیندا،
مئی، محببتدن ایچیب لاله بیتیبدیر یاناغیندا،
او بیر اوغلان کی، پری لر سو ایچرلر چاناغیندا،
اینجی قاینار بولاغیندا،
طبعی بیر سئوگیلی بولبول کی، اوخور گول بوداغیندا،
ساری سونبول قوجاغیندا،
سولار افسانه‌دی سؤیلر اونون افسونلو باغیندا،
سحرین چنلی چاغیندا،
شاعیرین ذٶوقو، نه افسونلو، نه افسانه لی باغلار،
آی نه باغلار کی “الف لیلی” ده افسانه ده باغلار.
اود یاخیب، داغلاری داغلار،
گول گولرسه بولاق آغلار.
شاعیرین عالمی اؤلمز، اونا عالمده زاوال یوخ،
آرزولار اوردا نه، نه خاطرلیه امکاندی، محال یوخ،
باغ جننت کیمی اوردا “بو حرامدیر، بو حلال” یوخ،
او محبتده ملال یوخ،
اوردا حالدیر، داها قال یوخ!
گئجه‌لر اوردا گوموشدندی، قیزیلدان نه گونوزلر،
نه زمرد کیمی داغلاردی، نه مرمر کیمی دوزلر،
نه ساری تئللی اینکلر، نه آلا گؤزلو اؤکوزلر،
آی نئجه آی کیمی اوزلر؟!
گول آغاجلاری نه طاووس کیمی چترین آچیب الوان،
“حلله” کروانیدی، چؤللر، بزه نر سورسه بو کروان،
دوه کروانی دا داغلار، یوکو اطلسدی بو حیوان،
صابیرین شهرینه دوغرو، قاطاری چکمه ده سروان،
او خیالیمداکی شیروان !
اوردا قاردا یاغار، آمما داها گوللر سول ابیلمز،
بو طبیعت، او طراوتده محال دیر، اولا بیلمز،
عؤمر پیمانه سی اوردا دولا بیلمز.
او افقلرده باخارسان نه دنیزلر، نه بوغازلار،
نه پری لر کیمی قوشلار، قونوب-اوچماقدا نه قازلار،
گؤلده چیممکده نه قیزلار.
بالیغ اولدیز کیمی گؤللرده، دنیزلرده پاریلدار،
آبشار مرواری سین سئل کیمی تؤکدوکده خاریلدار،
یئل کوشولدار، سو شاریلدار.
قصرلر واردی قیزیلدان، قالالار واردی عقیق دن،
“رافائیل” تابلوسو تک، صحنه‌لری عهد عتیق دن،
دویماسان کؤهنه رفیقدن.
جننتین باغلاری تک، باغلارینین حورو قوصورو،
الده حوری لرینین جام بولورو،
تونگونون گول کیمی صهبای طهورو،
نه ماراقلار کی، آییق گؤزلره رؤیادی دئییرسن،
نه شافاقلار کی، دیرن باخمادا دریادی دئییرسن،
اویدوران جننت-ی مأوادی دئییرسن!
زهره نین قصری بریلیان، حصاری اینجی دی، یاقوت،
قصر جادوی، مهندسلری هاروت ایله ماروت،
اوردا “مانی” دایانیب قالمیش او صورتلره مبهوت،
قاپی قوللوقچوسو هاروت!
اوردا شعرین، موزیکین منبعی سرچشمه‌دی قاینار،
نه پری لر کیمی فواره دن افشان اولوب اوینار،
شاعیر آنجاق اونو آنلار!
دولو مهتاب کیمی ایستخریدی فواره‌لر ایله،
ملکه اوردا چیمیر، آی کیمی مهپاره‌لر ایله،
گوللو گوشواره‌لر ایله!
شعر و موسیقی شاباش اولمادا، افشاندی پریشان،
سانکی آغ شاهی دیر اولماقدا گلین باشینا افشان،
نه گلین لر کی، نه انلیک اوزه سورترلر، نه کیرشان،
یاخا نه تولکو نه دووشان!
آغ پری لر، ساری کؤینه کلی بولودلاردان ائنیرلر،
سود گؤلونده ملکه ایله چیمرکن سئوینیرلر،
سئوینیرلر، اؤیونورلر.
قووزاناندا هله الده دولو بیر جام آپاریرلار،
سانکی چنگی لره، شاعرلره الهام آپاریرلار،
دریا قیزلارینا پئیغام آپاریرلار.
ده نیزین اؤرتویو ماوی، افقون سقفی سماوی،
آینادیر هر نه باخیرسان: یئر اولوب گؤیله مساوی،
غرق اونون شعرینه راوی.
غرفه لر، آی، بولود آلتیندا اولار تک گؤرونورلر،
گؤز آچیب یومما، چیراغلار کیمی یاندیقدا سؤنورلر،
صحنه‌لر چرخ فلک تک بورونوب، گاهدا چؤنورلر،
کؤلگه لیکلر سورونورلر.
زهره ایواندا الهه شینیلینده گؤرونه رکن،
باخسان حافظی ده اوردا صلابتله گؤررسن،
نه سئورسن.
گاه گؤرن حافظ شیراز ایله ایواندا دوروبلار،
گاه گؤرن اورتادا شطرنج قورارکن اوتوروبلار،
گاه گؤرن سازیله، آوازیله ائیله نجه قوروبلار،
سانکی ساغرده ووروبلار.
خواجه الحان اوخویاندا، هامی ایشدن دایانیرلار،
او نوالرله پری لر گاه اویوب گاه اویانیرلار،
لاله‌لر شعله سی، الوان شوشه رنگی بویانیرلار،
نه خومار گؤزلو یانیرلار.
قاناد ایستیر بو فضا، قوی قالا طرلانلی سهندیم،
ائشیت اؤز قیصصه می، دستانیمی، دستانلی سهندیم،
“سنی حیدر بابا” او نعره لریله چاغیراندا،
او سفیل داردا قالان تولکو قووان شئر باغیراندا،
شئیطانین شیللاغا قالخان قاتیری نوخدا قیراندا،
“دده قورقود” سسین آلدیم، دئدیم “آرخامدی”، ایناندیم،
آرخا دوردوقدا “سهندیم”ح ساوالان تک هاوالاندیم،
سئله قارشی قووالاندیم.
“جوشغونون” دا قانی داشدی، منه بیر هایلی سس اولدی،
هر سسیز بیر نفس اولدی.
باکی داغلاری دا، های وئردی سسه، قیها اوجالدی،
او تایین نعره سی سانکی بو تایدان دا باج آلدی،
قورد آجالدیقدا قوجالدی.
“راحیمین” نعره سی قووزاندی، دئییه ن توپلار آتیلدی،
سئل گلیب نهره قاتیلدی.
“رستمین” توپلاری سسلندی، دئییه ن بوملار آچیلدی،
بیزه گول-غونچا ساچیلدی.
“قورخما گلدیم!” دئیه، سسلرده منه جان دئدی قارداش،
منه جان-جان دئیه رک، دوشمنه قان-قان دئدی قارداش،
شهریار سؤیله م دن گاه منه سلطان دئدی قارداش،
من ده جانیم چیغیریب: جان سنه قوربان دئدی قارداش،
یاشا اوغلان سیزه داغ-داش دلی جئیران دئدی قارداش،
ائل، سیزه قافلان دئدی قارداش!
داغ، سیزه آسلان دئدی قارداش!
داغلی حیدربابانین آرخاسی هر یئرده داغ اولدی،
داغا – داغلار دایاق اولدی،
آرازیم آیناچیراغ قویمادا،آیدین شافاغ اولدی،
او تایین نغمه سی قووزاندی، اوره کلر قولاق اولدی،
یئنه قارداش دئیه رک قاچمادا باشلار آیاغ اولدی،
قاچدیق، اوزلشدیک آرازدا، یئنه گؤزلر بولاغ اولدی،
یئنه غملر قالاق اولدی.
یئنه قارداش سایاغی سؤزلریمیز بیر سایاغ اولدی،
وصل ایگین آلمادا، ال چاتمادی عشقیم داماغ اولدی،
هله لیک غم سارالارکن قارالار دؤندو آغ اولدی،
آرازین سو گؤلی داشدی، قایالیقلار دا باغ اولدی،
ساری سونبوللره زولف ایچره اوراغلار داراغ اولدی،
یونجالیقلار یئنه بیلدیرچینه یای-یاز یاتاغ اولدی،
گؤزده یاشلار چیراغ اولدی،
لاله بیتدی یاناغ اولدی،
غنچه گولدو، دوداغ اولدی،
نه صول اولدی، نه ساغ اولدی!
ائلیمی آرخامی گؤردوکده ظالیم اووچو قیسیلدی،
سئل کیمی ظولمو باسیلدی، زینه آخ اولدی، کسیلدی،
گول گؤزوندن یاشی سیلدی،
تور قوران اووچو آتین قوومادا سیندی، گئری قالدی،
اؤزو گئتدی، تورو قالدی.
آمما حیدربابا دا بیلدی کی، بیز تک هامی داغلار،
باغلانیب قول-قولا زنجیرده، بولودلار اودور آغلار،
نه بیلیم بلکه طبیعت اؤزی نامرده گون آغلار،
ایری یوللاری آچارکن، دوز اولان قوللاری باغلار،
صاف اولان سینه نی داغلار!
داغلارین هر نه قوچو، طرلانی، جئیرانی، مارالی،
هامی دوشگون، هامی پوزغون، سینه‌لر داغلی، یارالی،
گول آچان یئرده سارالی!
آمما ظن ائتمه کی، داغلار یئنه قالخان اولاجاقدیر،
محشر اولماقدادی بونلار داها وولقان اولاجاقدیر،
ظولم دونیاسی یانارکن ده تیلیت قان اولاجاقدیر!
وای …! نه توفان اولاجاقدیر!
دئدین: آذر ائلینین بیر یارالی نیسگیلی یم من،
نیسگیل اولسام دا گولوم بیر ابدی سئوگیلی یم من،
ائل منی آتسا دا اؤز گوللریمین بولبولویم من،
ائلیمین فارسیجا دا دردینی سؤیلر دیلی یم من،
دینه دوغرو نه قارانلیق ایسه ائل مشعلی یم من،
ابدیت گولویم من!
نیسگیل اول چرچییه قالسین کی جواهر نه‌دی قانمیر،
مدنییت ده بین ائیلیر بدویت، بیر اوصانمیر،
گون گئدیر آز قالا باتسین گئجه سیندن بیر اویانمیر،
بیر اؤز احوالینا یانمیر!
آتار اینسانلیغی، آمما یالان انسابی آتانماز،
فتنه قووزانماسا بیر گون گئجه آسوده یاتانماز،
باشی باشلارا قاتانماز!
آمما مندن ساری، سن آرخایین اول شانلی سهندیم،
دلی جیرانلی سهندیم.
من داها عرش اعلا کؤلگه سی تک باشدا تاجیم وار،
الده موسی کیمی فرعونا غنیم بیر آغاجیم وار،
حرجیم یوخ، فرجیم وار.
من علی اوغلویام، آزاده‌لرین مردی، مرادی،
او قارانلیقلارا مشعل،
او ایشیقلیقلارا هادی،
حققه، ایمانه منادی!
باشدا سینماز سیپریم، الده کوتلمز قیلیجیم وار!