نه روادیر اغنییالار باخا آج قالانا، یا رب!
بو نه سؤز کی، آج قالانا اولونا اعانه، یا رب!
چؽخا جانی آج قالانین گؤزونون ببکلریندن،
گئدیب ایشلهسین، قازانسین الینین امکلریندن،
ندیر اغنییایا خئیری اولارین یئمکلریندن؟
یئمهییب آجیندان اؤلسه دخی خوش بهانا، یا رب!
منه بویله-بویله ایشده دئمیین سؤز، ائی جمات!
نییمه گرک کی. یئکسر قؽریلیب اؤلور ده ملّت؟
یارادان خودایی-رازیق ائدجک اؤزو کفالت،
نه روا باخام فقیره، اۆرییم بولانا، یا رب!
بو قزئتچیلر دئییلمی کی، سالیب بیزی بلایه؟
ائله بیر ایش اولمامیش هئی وئریلیر صدا صدایه
کی، گرک کؤمک اولونسون فۆقرایی-بینوایه....
ائله پولدو گؤندریلسین او یانا-بو یانا، یا رب!
سنه نه، ائوین یؽخیلسین، فۆقرا اۆچون یانیرسان؟
آتان اوغلو قارداشیندیر، نه ده هیچ بیر تانیرسان!
ایکی گؤزلریمدی پولوم، کیشی، بیر مگر قانیرسان!؟
اونو وئرمک اولمور آخیر هر اؤلن-قالانا، یا رب!
فۆقرالار اغنیانین تانیسین نئچین یاخاسین؟
اگر آجدی قارنی ساتسین پاپاغین، چولون-چوخاسین؛
ائدر اغنییا دا باشقا ایشه دایر اؤز سخاسین،
مگر آزدی بذل و بخشی فیلانو فیلانا، یا رب!
ائله هئی قزئت یازیرسان، کیشی، بیرجه مطلب آننا!
عملین گؤر اغنیانین، یئری وارسا سونرا داننا!
پولونو فقیره وئرسین، بس آجیندان اؤلسون آننا؟
او مگر کی، خانسنمدیر، قاپیلار دولانا، یا رب!